Wir graue Krapft von Toggenbůrg probst Zurich vnd korher ze Kostenze vnd wir graue Friderich || vnd graue Diethelm von Toggenburg¹ gebrůder kunden allen dien, die disen gegenwurtigen brief sechent oder || ho^erent lesen, daz der erber edel knecht Toman von Lo^vmes², der ze lechen von vns hette die schůppůsse ze oberen Tutwile³, die || den von ime ze lechen hetten vnser lieben diener Heinr. vnd Herman ab dem Hus, das er vns die vf hat gegeben willeklich vnd gerne vnd ledig vnd fri, vnd hat dar nach der vorgenande Toman vnd die iezegenanden Heinr. vnd Herman ab dem Hus vns gebetten, das wirs dar zů von in allen hant vf genomen, dien iez genanden Toman, Heinr. vnd Herman, also dc es eigenlich in vnser hant gewalt vnd willen stůnt da mit ze tůnne vnd ze schaffen, swas wir mit dem selben gůte schaffen woltint, vnd do dis alles alsust beschen vnd geschaffet was, do batent vns die ieze dike genanden Heinr. vnd Herman ab dem Hus, das wir dur ir ewigen dienstez de egenande vnser gůt eigenlich gebent dien erwirdigen frowen in gotte der priolin vnd allem dem conuente da ze Wila⁴, da su hant hin getan des vorgenanden Heinrichs ab dem Hus elichen tochter. Da haben wir angesehen ir dienst, den su vns dike getan hant vnd noch tůn sont, vnd haint ir bette erho^ert vnd gewert vnd hant dien vorgenanden erwirdigen frowen von Wila das egenande gůt eigenlich vnd frilich gegeben eigenschaft vnd alles mit allem rechte vnd aller der rechtunge genempter vnd vngenemter gesůchter vnd vngesůchter, so dar zů ho^erent, vnd enzichent vns vnd vnser nakomen eweklich aller der ansprache an geistlichem vnd an weltlichem gerichte, so wir iemer an das vorgenanden gůte mo^echtin gewinnen. Vnd das dis alles war si vnd stet belibe nu vnd her nach bi vns vnd vnser nakomen, so geben wir die vorgenanden graue Kraft, graue Frider. vnd graue Diethelm von Toggenburg dien egenanden frowen des conuentes von Wila disen brief besigelten offenlich mit vnser aller ingesigelen ze einer steter vnd vester Sicherheit aller dir vorgeschribener dinge. Dis beschach vnd wart dir brief gegeben ze Lutispurg⁵ in der burg, do man zalte von gottes geburte druzehenhundert iar vnd dar nach in dem drie^a) vnd zwenzigosten iare, an dem nechsten donrstage nach sant Georien tage.

Source Fulltext: Chartularium Sangallense V, Nr. 3186, S. 451-452.