Ich her Walther der Maier von Altstettin¹ ritter künde allen den, die disen brief sehent, lesent alder hörint lesen, daz ich die zinse, daz sint zehen mut kerne und driu malter habern, diu ich älliu jar nam von dem gůt ze Tüffenbach², die mir stůndint zehen marke silbers, ledig und lär han gelan dem gotzhuse ze sant Gallen und ich der zehen marke silbers, dar umbe si mir stůndint, gar und gänzelich gewert bin. Und wil daz^a) wer sin vür mich und vür min sün und min erben, daz wir dehain buntnüst noch dehain recht me habint zů den zinsen und zů phanden, wan ich des silbers mit barem gůt gewert bin. Und loboti^b) daz mit gůten truwen, ob ich dehain brief han ald noch vinde umbe daz selbe phande, daz ich den minem herren dem .. abt von sant Gallen und dem convent wider gib, ân allen vürzog. Und daz diz vorgescriben dinge war si, craft hab und stät belibe, so henke ich her Walther der maier von Altstettin ritter min insigel an disen brief ze ainem euwigen^c) urkünde der warhait. Diz geschach und wart dirre brief geben ze sant Gallen, do man zalt von gottes gebürte driuzehenhundert jar und dar nach in dem sechzehenden jar, an der mitwochun nach unserre vrouwn tage, als si ze himel fůre.

Source Fulltext: Chartularium Sangallense V, Nr. 2979, S. 312.