Allen den, die disen gegenwurtigen brief sehent alder ho^erent lesen, kvnden wir .. die ra^ete vnd .. die bvrger gemainlich von Costentz, von Zvrich, von sant Gallen, von Schafhusen¹, von Lindo^vwe² vnd von Vber||lingen³, daz wir ainmu^eteclich vnd mit gůter betrahtvnge dvrch gemainen fride vnd beschirmvnge baidv vnserre stêtte vnd vnsers gůtes vnz zesamen haben verphlihtet mit trvwen vnd mit geswornen aiden, || ainanderen ze ratenne vnd zehelfenne mit gůten trvwen hinnan ze sant Johannes tvlt des To^vfers der na^ehsten vnd dannan vber ain jar daz na^ehste wider allerma^enlichem, der vnz mit gewalte vnd wider || dem rehten vnfv^oge prv^efet alder tv^ot, vnd ist daz svnderlich beschenen mit den nachgeschribenen gedingen. Swa dekain lantman vnz den vorgenanten stêtten dekainer gwalt ald vnfv^oge tv^ot an irer lvten an libe alder an gůte, dv selbe stat sol denne von êrste reht vorderon an den selben lantman, ist daz er sich dawider setzet, so sol dv stat den anderen fvnfen ir sache fvr lêgen, vnd so^elen die fvnf stêtte denne an den selben lantman reht vorderen vnd o^vch bieten von der ainvn stat, wolti er des niht tv^on alder nemen, so sint die fvnf stêtte denne gebvnden zehelfenne der ainvn mit libe vnd mit gůte, so verre si gedvnket bi ir aide, daz ez dv stat notdvrftig sîe vnd si ez o^vch gebvnden sîen zetv^ende von rehte. Wa^er aber, daz die ainvn stat des bedvnchti, daz si die andern fvnfe stêtte ald dekain stat vnder den fvnfen mit helfe fvrbaz mainen solte, danne ir beholfen wa^ere, darvber sol man nemen von iêgeslicher stat drîe bvrger, die sich vf ir ait erkennen, waz man ir^a) fvrbaz helfe tv^on so^ele, daz ez beschehe, alz den mêren tail gefv^ege dvnket. O^vch sîen wir vberain komen vf den ait, swaz dekainer stat vnfv^oge widervêrt, daz si von ir selbe âne die andern fvnf stêtte gerihten mac mit liebe vnd ane geva^erde, daz si daz vz rihte bi ir aide. Wa^er aber, daz si ez von ir selber niht gerihten mo^ehte, so mac si denne wol den anderen fvnfen ir sache fvr lêgen, vnd sint die fvnf stêtte denne gebvnden zehelfenne der ainvn, alz vor geschriben ist. O^vch sol man wissen, daz die êreba^eren bvrger von Zvrich, von sant Gallen, von Schafhusen, von Lindo^vwe vnd von Vierlingen den bvrgern von Costentz vz hant gelazen, wa^er daz vnser herre .. der bischof von sin selbes alder von sinz gotzhuses wegen in dekainen stôz alder vmminne geviele mit den vorgenanten fvnf stêtten ald mit ir dekainer, des sint die bvrger von Costentz gebvnden bi ir aide ze rihtenne mit liebe, so verre si mvgent ane geva^erde, mo^eht aber des niht beschehen, so so^elen si weder ir hêrren noch den stêtten ihtes beholfen sin in der sache. O^vch veriehen wir die bvrger von Costentz, wa^er daz vnser herre .. der bischof gegen den vorgenanten fvnf stêtten iemanes^b) helfer wolti sin, daz inen ze schaden mo^ehte komen, daz wir inen gebvnden sîen zehelfenne ane geva^erde in allem dem rehte, alz vor geschriben ist. Hiebi veriehen wir, wa^er daz, ob wir mit vnserm herren .. dem bischof alder er mit vnz in dekaine vmminne vîelen alder stôz ka^emin, da so^elen die fvnf stêtte von Zvrich, von sant Gallen, von Schafhusen, von Lindo^vwe vnd von Vberlingen weder vnserm herren dem bischof noch vnz ihtes beholfen sin, wan so vil si gerne tv^ont vnd so vil, daz si vnz mit gůten ta^egedingen vnd mit liebe gerihten, so vêrre si mvgent vf ir ait. O^vch svlen die bvrger von sant Gallen gegen ir herren .. dem abbet von sant Gallen beliben vnd sin in allen den gedingen, alz die bvrger von Costentz in selber hant svnderlich vz gedingot gen ir herren vnserm herren dem bischof von Costentz. O^vch sol man wissen, wa^er daz der sehs stêtte dekainv ieman dieneti ald dekainen vzbvrger ald diener an sich na^eme âne der anderon fvnf stette rat vnd willen, da sint die selben fvnf stette der ainvn nihtes gebvnden ze helfenne, swaz si da von bresten nimet, danne so verre si gerne tv^ont dvrch ir gůten willen. Wa^er o^vch daz in den vorgenanten sehs stêtten dekain tail alder dekain krieg vfstv^ende, da sint .. der rât vnd .. die burger in der selbvn stat gebvnden bi ir aide, daz si daz vzrihten ob si mvgen, wa^er aber, daz ez vnder in niht mo^ehte gerihtet werden, so sol von den anderen fvnf stêtten allenthalben der rât vnd die bvrger hin senden ereba^ere lute, daz si daz vz rihten, vnd swedere tail sich dawider setzet, so so^elen denne die fvnf stêtte dem andern taile beholfen sin mit libe vnd mit gůte, so verre si mvgen, daz ez gerihtet werde ze minnen ald ze rehte. Wa^er o^vch, daz vnder den vorgenanten sehs stetten dekaine zwo ald drîe krieg ald stôz mit anderen gewunnen, daz so^elen die andern stêtte vz rihten bi ir aide, vnd so^elen o^vch die zwo stêtte ald die drîe gehorsam sin bi ir aide, âne vmb aigen, vmb êrbe vnd vmb gulte, da sol îegslich stat beliben in allem dem rehte, alz si vor waz vnd her komen ist. Wa^er o^vch, daz dekain bvrger in den vorgenanten sehs stêtten ieman der lantlute dieneti alder dienen wolti ane siner bvrger willen, des selben bvrgers sol sich dv stat entânen, so verre daz si von sinen wegen in dekainen krieg gevallen mvge, gescha^ehe des niht, so sint die andern fvnf stêtte der ainvn nihtes gebvnden zehelfenne vmb die sache. O^vch veriehen wir, swaz wir alle sehs stêtte mit ieman biz her vf disen tag zetv^ende han gehêbt, daz enkain stat der andervn ihtes gebvnden ist ze helfenne vmb die sache, wan so verre si gerne tv^ot alder mit gůten ta^egedingen gehelfen kan. Ez sol o^vch dv gelubde vnd vnser ait vf daz vorgenante zil sta^ete beliben, alz vor geschriben ist, danne so vêrre^c), ob ain kvneg wurde, der gewaltig wurde in Costentzer bistv^om, an den soltin wir doch werben, daz er vnz gvnde sament ze belibenne die vorgenanten jârzal vz. O^vch sien wir die vorgenanten sehs stêtte des gebvnden, daz wir dekainen herren nemen so^elen, wan mit gemainem rate vnd willen vnser aller sehs stêtte alder mit den, die von den stetten darzv^o genomen werdent, ald dem meren tail vnder vnz wol gevallet. Vnd hiervber daz alles daz, so vorgeschriben ist, sicher vnd sta^ete belibe, so hîezen wir die vorgenanten bvrger von Costentz, von Zvrich, von sant Gallen, von Schafhusen, von Lindo^vwe vnd von Vberlingen diser briefe sêhse gelich schriben vnd haben die besigelt mit vnser sehs stêtte insigeln zainem waren vrkvnde. Diz beschach vnd dise briefe wurden geben in der vorgenanten stat ze Costentz, in dem jare, do man zalte von gottes gebvrte drvzehenhvndert jare vnd in dem fvnfzehenden jare darnach, an dem na^ehsten sameztage nach vnserre vro^vwen tage ze der liehtmisse.

Source Fulltext: Chartularium Sangallense V, Nr. 2914, S. 269-271.