Allen denen, so disen brieff sechent lesent oder ho^errend lesen, tůn wir kunt frow Adalheit her Eglolffs seligen eliche frow von Altstetten vnd Eglolff ir sun¹ vmb die lut vff Guntzerren², die Eglolff der Blarer vnd Heinrich sin brůder koufften von dem erbern man Cůnrat dem Cuhimeister³ von sant Gallen vnd im geuertgot wurden mit vnsers vorgenempten wirtes vnd vatters her Eglolffs seligen hand, von dem er si ouch koufft hatt, vnd vmb den hoff ze Ruti⁴ ze Luchingen⁵ vnd vmb den bongarten ze Altstetten an der Gebratten⁶, die der spital⁷ koufft vmb den vorgenempten her Eglolff von Altstetten, das das vnser gůter wille ist, vnd enzihen vns aller der ansprach, so wir jemer mo^echtin gehan oder gewinnen an den vorgenempten luten ald gu^etern vnd aller der recht, so vns jeman ze statten mo^echt komen vmb die selben lut vnd gu^eter an geistlichem vnd ouch an weltlichem gericht. Wir verjechen ouch, das wir der vorgenanten lut vnd gu^eter recht wer sond sin des vorgenempten spitales vnd Eglolffes des Blarers, vnd haben das gelopt stet ze haben mit vnser truwe in eides wise. Vnd das dis war vnd sta^et belib, so han wir erbetten vnsern lieben vettern her Walthern von Altstetten den Meyern⁸, der der vorgenanten frowen recht vogt ist, das er sin insigel an disen brieff henk ze einem waren vnd sta^eten vrkund der vorgenanten geschribnen ding, vnd henk ouch ich der vorgenant Eglolff des vorgenempten her Eglolff seligen sun min insigel an disen brieff fur mich vnd min můter, wan si selb dehein insigel hatt, ze einem offen vnd waren vrkunde der vorgeschriben ding. Do dis alles geschach, do was ze gegen her V^olrich der Burger lupriester ze Altstetten, her Heinrich von Altstetten⁹, her Cůnrat vnd her Herman von Gru^enenstein¹⁰ gebrůder, Heinrich der Schnetzer von Altstetten, Heinrich von Luchingen vnd inder biderber lut gnůg. Dirre brieff wart geben ze Altstetten in der statt an vnser frowen abent ze der liechtmisse in dem jar, do man zalt von gotz geburt drutzehenhundert vnd im funffzehenden jar.

Source Fulltext: Chartularium Sangallense V, Nr. 2913, S. 268-269.