Wir Elsbethe von gottes gnaden ebtischen des gotzhus Zurich¹ kunden allen, die disen brief sehent oder ho^erent, das fur || vns kam fro Katherina hern Chu^onratz Martis sêligen tochter vnd offenlich veriach, das si ze ko^vfenne hat gegeben ir hus || vnd hofstat Zurich, sint gelêgin vnder Nideren Zunen² vor den Minren Brůdern³ entzwischen meister Peters hus des arzattes || vnd swester Iten^a) hus von Meilan⁴, vnd erb ist von vnserm gotzhus vmb ein einen^b) Zuricher pfenning, fron Margarethen hern Růdolfes Stagel wirtin des jungen vmb siben vnd sêchzig pfunt Zuricher Pfenninge, vnd ist o^vch der gewert nach ir vergich alleklichen, vnd gabs vf an vnser hant vnd bat vns lihen fro Margarethen der vorseiten ze rechtem erbe. Wir erhorten dise bêtte vnd lihen das vorgenande hus vnd hofstat mit allem dem rechte, das dar zů geho^eret, fron Margarethen der vorschriben ze rechtem erbe vmb den vorseiten zins, vns vnd vnserm gotzhus jêrlich ze gebenne ze des heiligen kruzes tult ze herbest. Ovch sol man wssen, das fro Margarethe du vorseite das vorgenande hus vnd hofstat mit vnserre hant, willen vnd gunst gemachet hat hern R. Stageln ir wirte ze rechtem lipgedinge vnd ir beider kinden, du si nu sament hant oder noch sament gewnnent, ze rechtem erbe. Vnd das dis war si vnd veste belibe, so geben wir disen brief besigelt mit vnserm ingesigel ze einem waren vrkunde offenlichen. Dis geschach Zurich an dem na^ehsten mitwehen nach sant Jacobes tult, do von gottes geburt waren druzehenhundert jar, in dem zêhenden jare da nach, da zegegin waren her Chůnrat von sant Gallen vnser kapplan⁵, her Bur. Schafli, her C. Saler, her R. her C. her C. die Stageln burger Zurich, Heinrich ab dem Wasen vnser amman vnd ander erbere lute.

Source Fulltext: Chartularium Sangallense V, Nr. 2752, S. 186.