Omnibus Christi fidelibus, ad quos presentes pervenerint, Anna abbatissa totusque conventus monasterii in Veltpach¹ ordinis Cysterciensis orationes in || domino cum noticia subscriptorum. Noverint universi, quos nosce fuerit oportunum, quod nos receptis quinquaginta marcis puri et legalis argenti || ponderis Constanciensis a Werenhero dicto Hunt² cive oppidi sancti Galli, quas in utilitatem evidentem nostri monasterii convertimus, ut presentibus || profitemur, habito tractatu sufficienti de communi et unanimi consensu astrinximus et astringimus per presentes tam nos quam nostros successores sollempni interposita stipulacione, quod vineam dictam Lo^eli sitam iuxta muros monasterii in Veltpach nostro monasterio iure proprietatis pertinentem non ullo unquam tempore vendicioni exponere obligacioni vel quovis alienacionis titulo debeamus, sed quod dicta vinea perpetuo sub proprietatis titulo debeat nostro monasterio remanere, et quod de fructibus vinee memorate prefato Werenhero ac Berhte uxoris eius legitime, quamdiu vixerint, duo plaustra vini mensure in Stegboron³ annis singulis in festo sancti Martini per nos assignari debeant et persolvi, nisi fructus predicti grandine, frigore, pluvia vel quovis alio casu fortuito vel non fortuito destructi fuerint in toto vel in parte, quo anno considerata qualitate dampni habiti tantum de mensura vini predicti debet persolvi personis predictis, quantum solvi potest sine dispendio monasterii antedicti, postquam autem dicte persone de hac vita migraverint, dicta duo plaustra vini ad dictum monasterium debent reverti, contradictione heredum dicti Werenheri eiusque .. uxoris aliqua non obstante, et deservire perpetuo mense conventus nostri monasterii antedicti, ita videlicet, quod in qualibet septimana per circulum anni illo die, in qua festum annunciacionis beate Marie virginis evenerit, de duobus plaustris predictis una urna vini cum quartali dimidio dicte mensure per .. abbatissam, que pro tempore fuerit, sine diminucione perpetuo ministretur, ita tamen, quod ex hoc prebenda solita, que in vino dari consuevit, nullatenus minuatur, et ut hec in perpetuum valitura permaneant, nos .. abbatissa premissa totusque conventus monasterii memorati pro nobis nostrisque successoribus has penas in nos suscipimus spontanea voluntate, ut si per nos vel per nostros successores quovis titulo a nostro monasterio dicta vinea fuerit alienata, quod pecunia inde habita dari et distribui debeat monasteriis in Salem⁴, in Tennichouen⁵ ac hospitalibus civitatis Constanciensis et opidi sancti Galli⁶, sed si aliqua ex dictis monasteriis seu locis ipsis partem sibi debitam ob favorem vel ob amorem dicti monasterii in Veltpach nollent recipere, illa pars monasteriis seu locis debet accrescere, que dictam pecuniam volunt et desiderant sibi dari, sed si dicta vinea inalienata seu indistracta remanserit dicto monasterio in Veltpach et quantitas vini, ut premittitur, distributa seu ministrata non fuerit, tunc in penam .. abbatissa et conventus, qui pro tempore fuerint, quatuor karratas vini de predicta vinea debent persolvere locis et monasteriis antedictis, eo anno videlicet, quo in distribucione premissa inventi fuerint negligentes, debent etiam ab ingressu ecclesie suspendi, si legitime commoniti predicta pena, ut premittitur, per eos non fuerit persoluta. Et in evidenciam premissorum presentes litteras fieri fecimus sigillo proprio communitas. Datum et actum Constancie presentibus dilecto in Christo Symone plebano ecclesie sancti Stephani Constanciensis⁷, Eberhardo dicto Bu^ezbart notario curie Constanciensis ac aliis quampluribus fide dignis, anno domini M°.CCC. decimo, quarto non. iulii, indic. octava.

Source Fulltext: Chartularium Sangallense V, Nr. 2751, S. 185-186.