Universis Christi fidelibus presentium inspectoribus Chonradus abbas totusque conventus monasterii Fabariensis, ordinis sancti Benedicti, Curiensis dyocesis, affectum caritatis. Quoniam omnia sunt hominum tenui pendentia filo et subito casu que valuere ruunt, dignum censetur, ut ea, que geruntur in tempore, ne hominum ac temporis transitu labantur, ad perpetuationem scripture testimonio roborentur. Noverint igitur, quos nosse fuerit oportunum, quod nos specialia tractatu, prehabito communi consensu atque concordia, sponte, bona fide, sine omni dolo et fraude ac tergiversatione promisimus et promittimus predilecto benefactori nostro magistro Henrico dicto de Wetigis¹, canonico ecclesie Werdensis², quod ipsi Henrico sine omni allegatione et exceptione gratie seu indulgentie iuris vel facti providebimus facultate oblata in beneficio^a) ecclesiastico consueto secularibus clericis assignari, quod idem magister a nobis duxerit acceptandum, quam cito Walthero dicto de Lo^vbecch³ canonico sancti Iohannis in Constantia⁴ a monasterio nostro provisum fuerit vel idem cesserit vel de presenti seculo subducatur. Si vero facultas se obtulerit in beneficio^a) aliquo, quod idem Waltherus a nobis non duxerit acceptandum, idem predicto H., si voluerit, liberaliter conferimus. Et in huius oblationis testimonium et evidentiam pleniorem prelibato magistro Henrico nos et nostrum monasterium obligamus tradendo sibi presentem litteram sigillis nostris patenter communitam. Datum Fabarie presentibus domino Conrado rectore ecclesie in Walastade⁵ et domino Burchardo rectore ecclesie in Ragazs⁶ nec non Her. plebano rectore ecclesie in Vazs⁷, qui hanc litteram conscripsit, et quibusdam aliis ad hec specialiter vocatis et rogatis anno domini M°CC°LXX°III°, quarto idus ianuarii, indictione prima.

Source Fulltext: UB der südl. Teile des Kantons St. Gallen I/7, Nr. 602, S. 425.