Wir Albrecht, Heinrich und Otto, von gotes gnaden Hertzogen ze Oesterrich und ze Styr verichen offenlichen mit disem brief, und tuon chunt allen den die in ansehent lesent, oder hoerent lesen Daz unser getriwer Leutold von Wildegg dem Erbern mann Chuonrad dem Wiltwercher unserm Burger ze Wienn, verchouffet hat die zehenden auf acht lehen ze Ruoprechtzdorf, und auf vierzehen lehen datz Zedleinsdorf, die er von uns ze lehen hat, und die lehen haben wir von im auf genomen, und haben die dem selben Chuonraden, seiner hausfrawen, und seinen Erben, Suonen und Tochtern, ze rechtem lehen gelihen, daz si die lehen inne haben sulln und allen iren frumen da mit schaffen nach des lantz recht ze Oesterrich, und des ze einem offenn urchund. Geben wir dem voergenanten Chuonraden, seiner hausfrowen und iren Erben, disen brief versigelten mit unser Hertzog Albrecht, dar an auch uns Hertzog Heinrich und Hertzog Otto wol benuoget. Der brief geben ze Wienn an sant Pauls tag. da man zalt von Christes geburd dreuzehenhundert jar dar nach in dem vier und zwaintzgisten jar.

Source Fulltext: Peter Peusquens