Wir Albrecht von gots gnaden, Hertzog ze Oesterreich, ze Steyr, ze Kernden und ze Krain, Graf ze Tyrol etc. Embieten unsern lieben getrewn, allen Lantherren, Rittern, und Knechten, Purgra-fen, Phlegern, Mauttnern, Zolnern, Purgern in Stetten, in Merkten, und in Doerffern, und auch an den verfaren und allen andern unsern Amptleuten, und undertanen, den diser brief getzeigt wirt, unser gnad und alles guet. Wier gebietten ew allen gemainlich und ewer yecklichem sunderlich, daz ier vestiklich wert, und understet, daz nieman dhainen ungrischen wein, ueber land, noch ueber wazzer, von ungern, ueber di Gemerker in unser land fure, welich aber daruber mit wein von ungern, in unserm lande begriffen werdent, denselben sol man nemen denselben wein, Ros, und wêgen, und di sullen sein, halbe unser, und der ander halb tail soll gevallen dem, der die wein, Ros, und wêgen, oder wie das genant ist nimt an alles geverd, und wellen auch darzue denselben swêrlich pezzern, an leib und an guet, wan wir mainen, das kain froemder wein, in unser land gefurt werd. Geben ze Wienn, an Eritag vor Marie Magdalene Anno etc. LXX secundo. dominus dux per se et consilium

Source Fulltext: Peter Peusquens