Universis et singulis ecclesiasticis et secularibus presentes litteras inspecturis salutem et apostolicam benedictionem. Cum acceperimus venerabilem fratrem Archiepiscopum coloniensem violenter detineri. Nos animadvertentes id non posse transire nisi cum gravissima dei offensa, apostoliceque sancte sedis lesione, et eorum qui causam prestant, animarum preiudicio: cum etiam indecens apud quoscunque sit, in Prelatum dei violentiam inferre: ex pastorali officio remedia duximus adhibendum. Quocirca omnibus et singulis prefati Archiepiscopi Detentoribus, seu illius detentioni auxilium, consilium, vel favorem, publice vel occulte prestantibus. cuius-cunque dignitatis, gradus et conditionis fuerint, tenore presentium apostolica auctoritate sub excommunicationis late sententie pena districtius precipiendo mandamus, quatenus visis presentibus, ab omni detentione huiusmodi cessantes, prefatum Archiepiscopum relaxent, liberent, et pristine libertati restituant, neque in eum aliquam violentiam vel iniuriam inferant: quod si mandatis his nostris detentores vel auxiliatores predicti, contravenire (quod absit) presumpserint, sciant nos ad declarationem et publicationem ecclesiasticarum censurarum et penarum contra eos processuros, Taliaque remedia etiam adhibituros, per que et eorum contumacia compescatur, et ipsius Archiepiscopi liberationi consulatur. Datum Rome apud sanctum Petrum sub annulo piscatoris die XXV. Septembris. MCCCCLXXVIIII. Pontificatus nostri Anno Nono. L. Grifus.

Source Fulltext: Peter Peusquens; siehe auch: Chmel, Monumenta Habsburgica I, 3, 460 n° 60.