Ich Lucas der Popphinger, und Ich. Chlar sein hausvrowe. vergehen offenleich. und tuen chunt, allen den di disen prief lesent oder horent lesen, umbe den zehent, gelegen zu Wuntzesdorf. auf fumf und zwaintzig lehen und auf zwain hofsteten, chlainen, und grozzen, der da lehen ist, von hern Leutolten von Chunringen den uns mein Swager her Seifrid. des Hertzogen obrester Schreiber, und anwalt in der Munzze zu Wienne und vrowe Margret, sein hausvrowe mit Lehenherren hant, durch irer trewen willen gemacht und verschriben habent, als der prief sagt der mit Lehenherren Insigel. dar uber gegeben ist daz wir uns hin wider mit unsern trewen gegen dem obgenanten hern Seifriden und vrowen Margreten seiner hausvrowen und iren Erben verlupt und verpunden haben und verpinden uns auch. mit disem prief. wenne si oder ir Erben den egenanten zehent, verchauffen oder versetzen wellen. daz wir si dar an nicht hindern noch irren schullen, weder umbe wenig noch umbe vil. wanne si da mit mit unserm gueten willen allen iren frumen schaffen mugen an allen irrsal. Und des zu urchunde gib ich in disen prief. versigelten mit meinem Insigel. und mit meines Sweher Insigel. hern Hainreiches des Oeler der mit seinem Insigel diser sache gezeug ist Der prief ist gegeben nach Christes geburde dreutzehenhundert jar dar nach. in dem fumftzigisten jar des naesten Eritages vor dem Swartzen Suntage.

Source Fulltext: Peter Peusquens