Wir Fridreich von Tirna, zu den zeiten purgermaister, und der Rat gemain von der Stat zu Wienne, vergehen offenleich mit disem prief, daz fur uns chome in den Rat, der Erber herr und priester, her Jacob der Polle, chapplan unser Vrown chappln datz hern Otten dem Haymen und bewaert daz, vor unser, mit vrown Gedrauten, der Rauhenworterinne, und Jacoben von Holebrunne, di dar umb sagten als si zu recht scholten, daz Chunrat der Pekche, in sand Johanstrazze, und sein hausvrowe, vrow Margret, der egenanten chappellen, recht und redleich, geschaft hieten zu einer ewigen Messe, iren Weingarten gelegen zu Chlaitzinge, des ein halbes jeuch ist, und haizzet der Pogner, und ir haus, in der egenanten sand Johans strazze, da si selber inne gesezzen waren zu naehst der egenanten sand Johanser haus. Also beschaidenleich, daz der egenant chapplan her Jacob der Polle, dreutzehen phunt, Wienner phenning, da von gelten scholt den Geltern den der egenant Chunrat der Pekche, und sein hausvrowe, vrow Margret, di schuldig sind gewesen und vir und zwaintzig Emmer Weins scholt er, da von hintz der pharr, hintz sand Stephan geben, und daz hat er, alles gericht. Und des zu urchunde, geben wir im disen prief, versigelten mit unser stat chlainem anhangendem Insigel, der gegeben ist nach Christes gebuerd dreutzehen hundert jar, dar nach in dem Neun und Virtzigisten jar, des naehsten Eritages vor sand Michels tag.

Source Fulltext: Peter Peusquens