Ich Gerunch der Chol. zue den zeiten amptman des Chlosters ze Neunburch Vergich und Tuen Chunt allen den die disen brief lesent oder hoerent lesen. die nu lebent und hernach chuenftich sint. umb den Weingarten Gelegen ze Grintzing. in dem Mukkental. des dreu viertail sint . und haizzet der Scherg daz ich von des vorgenanten Chlosters wegen . rechter amptman bin . ze stiften und ze storen . dem man auch alle iar da von dient achthalb viertail weins. ze perchrecht. und dritthalben wienner phenninge ze voytrecht . und nicht mer. und leit auch der selb weingartt ze naechst dem weingarten der weiln der Hailmannine Gewesen ist. Und hat auch den egenanten weingarten Gehaizzen der Scherg ledichleichen Geschaft. Ulreich vom Pukkas. dem Got genade. der Chappellen unser vrowen. in der Purger Rathaus ze Wienne hern Otten Haime stiftung ze Einer Ewigen Mess. alz der Geschaeftbrief sagt der umb den selben weingarten . und umb ander guet auch zu selgraet gegeben und verschriben ist Daz ich den Erbern herren, hern Jacoben den Pollen zue den zeiten Chappllan und verweser . der vorgenanten Chappellen unser vrowen . in der Purger Rathaus ze Wienne des obgenanten weingarten Gehaizzen der Scherg . Recht und redleich . Gewaltich Gemacht und an die Gewer gesatzt han. also daz Er . oder swer der Egenanten Chappellen nach im Chappllan und verweser ist . mit dem selben weingarten . suln fuerbas allen iren frumen schaffen . in alle dem recht . alz der Geschaeftbrief sagt. den der obgenant Ulreich vom Pukkas dar umb gegeben hat. alz vor verschriben ist . und dez zue urchuent so Gibe ich in disen brief . versigilt mit meinem Insigil. und mit hern Hainreichs Insigil dez Wuerffels. zue den zeiten Muensmaister ze Wienne . der diser sache gezeug ist mit seinem Insigil . Diser brief ist Geben ze Wienne nach Christes Gepuerde dreutzehen hundert iar dar nach in dem Neun und viertzigisten iar . an sant Gylgen Tage.

Source Fulltext: Peter Peusquens