Fridreich von gots gnaden, Roemischer Kuenig, zu allentzeiten Merêr des Reichs, Hertzog ze Osterreich, und ze Steir etc. Erbern weisen und lieben getrewn. Als wir ew und unsern getrewn lieben..dem Richter und Rat ze Judenburg ainen tag auf den phintztag nach dem heiligen phings-tag schiristkuenftigen fuer uns zekomen benennet haben von der zwayung so zwischen ewr baider-seitt sind von gerechtikchait wegen, so dieselben von Judenburg mit hanndlung und Gwerb mit ew ze Wienn ze haben mainen, dieselben sachen Ir aber durch menigerr ursach willen begert, auf unser kunft widerumb hinaus gen wienn ze schieben, als dann das der Ersam unser getrewr lieber andêchtiger Maister Ulreich Sunnenperger unser prothonotary, aigentlich an uns pracht hat. Also wellen wir solh verhoerung, untz auf unser kunft widerumb hinaus ze Lannd angesteen lassen, und so wir alsdann von ew baiden tailen oder ainem angelangt werden, annder têg darumb setzen und verrer darInn hanndeln, was pillich ist, und haben den egenanten von Judenburg das auch ver-kundet. Geben ze Graetz an des heiligen Kreutz tag Inventionis, anno domini etc. xlviii°, Unsers Reichs im Newndten jare. commissio domini Regis in cons(ilio).

Source Fulltext: Peter Peusquens