Ich Ewstachius Jacoben von Velach Burger zu Wienn seligen Sun Bekenn das mir die Ersamen weisen herren..der Burgermaister, und der Rat der Stat zu wienn Ingeantwurt habend, mit namen ain geltbrief, der da lautt das mir Hanns praitter von meins vaeterlichen hauss wegen, das Sy Im zu kauffen geben habend schuldig ist drithalb hundert phunt phening, dafuer er mir dasselb haus widerumb zu phant verschriben hat und ain heiratbrief lautt von Hannsen Sarger meinem Swager zwayhundert phunt phening haimsteur aus ettlichen seinen weingêrten verphent, und all ander mein Erbbrief geltbrief grichtbrief und ander brief wie die genant sein kainer ausgenomen, die der obgenant mein vater seliger gehabt und hinder sein gelassen hat, und mir zugebuernt. Davon sag Ich fuer mich und all mein erben, die egenanten mein herren..den Burgermaister, und den Rate der Stat hie zu wienn und all Ir Nachkomen der obgenanten brief aller, und auch der hand-lung von verkauffens wegen des egenanten meins hawss gentzlich quitt ledig und los vor aller ansprach und vodrung getreulich und ungeverlich. Mit urchund des briefs besigilt mit der erbern weisen Niclasen des Purger Burger zu wienn und Symons von Eslorn burger daselbs anhangunden Insigln Die Ich zugetzeugnuess der sach mit vleiss darumb gepeten hab In und Iren erben an schaden. Darunder Ich mich mit meinen trewn verpinde stetzuhalten und Bekenn alles des sovor geschriben stet. Geben zu Wienn an Montag nach sand Kathreintag. Nach kristi gepurd virtzehenhundert jar darnach in dem Siben und virtzigisten jare.

Source Fulltext: Peter Peusquens