Erbern weisen herren unsere besunderlieben frunde Unsern willigen dinste zuvor. Ewern Eren thuen wir zuwissen, das vor zeiten menigermol unsere Tuchmacher und kaufflewt an uns geprach haben, wie sy oft von Erbern kauflewten zu euch und anderswo bestossen und mit rede angelangt sein warden, von der Tucher wegen, die In vor Bruenner tucher verkaufft sein, das diselbigen Tucher an der leng und arbeit nicht rechtferticlich derfunden wurden des sich unsere Tuchmacher und kauflewt fast vor frumen lewten geschêmt und kegen uns derklagt haben das In solichs fur-gebarffen und aufgehaben wirt, des sy unschuldig sein, bitund das wir dafuer gedechten dadurch das bewart, und sy solicher smeung vertragen wurden, haben wir darauff gedacht, durch rechter Erberkeit und eines gemeynen nutz willen, Armer und Reicher, die mit Tuechern handeln, es sey im lanndt ader ausserthalb lannds, das sy soliches schadens vertragen mechten werden, und unsere Tuchmacher mit Iren Tucheren Ire arbeit und frum lewt bewarten und hinfur unverdacht beliben und haben unsern Tuchmacheren verhangn Ire Tucher zu sigelen und beschawlewt dorauff gesatzt, dadurch die leng und die arbeit der tucher bewart werden, darumb In etzliche Tuch-macher in Steten zu Marhern ursach nemen und sten dawider woellund, das solich Sigelen der Tucher nicht geschech, das uns, und menigere unpillich deucht, sintemolen ein itzlicher sich seiner arbeit frewen und noch dem pesten geniessen solt, als sich dann unsere Tuchmacher Irer arbeit an ewre undersessen und kauflewt zu euch und anderswo wonunden berueffen und sich ytzund zu ewer Erberkeit fugen Biten wir mit fleiss was ewrer Erberkeit und den ewern von unserer Tuchmacher arbeit wissund ist, ader vor ewer weisheit ausgeweist wirt, In des ein kuntschafft zugeben, das wellen wir umb ewer Erberkeit verdienen. Datum Sabbato ante Bartholomei Apostoli Anno etc. XLVIto. Burgermeister und der Rate der Stat Brünn

Source Fulltext: Peter Peusquens