Fridreich von gots gnaden, Romischer kunig, zu allenzeiten Merêr des Reichs, Hertzog ze Oesterreich und ze Steir etc. Erbern weisen lieben getrewn. Wir sind nêchst wol underweist worden durch Gasparen unsern Cantzler, wie der geprech an dem ausgeben des gelts, daz Ir darleihet, gewesen sey, daz unser hofmaister Conrad von Kreig, seine zway hundert phunt nicht abzulassen, sunder die ynzenemen meynet, nach laut unsers geschêffs, darauf wir den Fuchs-perger zu Im gesandt, und In gern wolten, an ander end verweist haben, das er nue nicht zutuen meynet, und wan aber die sach notleich sind, und durch soelich Irrung, vil mag versawmt werden. Begern und pitten wir euch mit gantzem fleiss daz Ir uns zu gevallen, den hofmaister die zway hundert phunt heben lasset, und daz euch Hanns Maler glob, euch darnach gewerttig zu sein in aller masse, als dann beredt ist, und was euch dann von sand Mertens tag ueber ein jar von dem prukgelt aussen stuende, und nicht wuerde der selben summe muegt Ir euch, von der schatzstewr bey euch volkomenleich betzalen, dasselb euch dann Maister Hanns Meirs, mit unserm brief versorgen sol, und getrawn euch wol, Ir werdet uns des nit versagen, des verlassen wir uns gantz zu euch Ir werder das gelt darauf hinaus geben, damit soelich anligund notdurfft gefuerdert, und nit gesawmet werden. Das kuemt uns von euch zu guetem danck. Geben zu der Newnstat an freitag, nach sand Pangrêtzen tag, anno domini etc. xlvjto , unsers Reichs im Sibenden jar. commissio domini Regis in consilio.

Source Fulltext: Peter Peusquens