Fridreich von gots gnaden Roemischer Kunig zeallenzeiten Merer des Reichs Hertzog zu Osterreich ze Steir etc. Erbern weisen und lieben getrewn. Wir lassen ew wissen, daz uns gar gewisse warnung chomen ist wie sich die Ungern an menigen ennden vast und starckh besamen, und mit macht in unser furstentumb Osterreich zeziehen und das zubeschedigen maynen, wann wir aber solhem Irm fuernemen und muettwillen mit gots ewrer und annderer, den wir yetz auch darumb schreiben hilff und peystannd ye widersteen und veld wider Sy machen wellen. Davon so begern und bitten wir ew mit gantzem fleiss emphelhen ew auch enstlich, daz Ir ew auf das pest und sterkist, so Ir ymmer kuend und muegt zerossen und zefuessen, mit deichsel wêgen Speis puechsen harnasch armbrusten hawen schaufeln krampen und allen andern notdurf-ten zuricht und damit auf den nachsten mittichen in phingst feyertaegen schiristkomend, bey uns ze prukh auf der Leytta seitt, geschickt verer mit uns zeveld zeziehen und mitsampt anndern unsern lanndlewten, den veinden zewidersteen, als Ir uns, unserm lieben vettern kuenig Lasla-wen, ewselbs lannden und lewtten des schuldig seit, und lasst ew daran nichts sawmen noch irren wann des ein grosse notdurfft ist, das wellen wir gen ew mit sundern gnaden erkennen und zu gut nicht vergessen und unsern benanten lieben vettern kuenig Laslawen daran weisen das er das auch gen ew und ewren kinden in guten erkenne. Geben zu der Newnstat an Mittichen nach des heiligen Krewtz tag inventionis. Anno domini etc. xlvjto, unsers Reichs im Sibenden Jare. commissio domini Regis in consilio.

Source Fulltext: Peter Peusquens