Von gotes genaden Johanns Cardinal und Bischove zue Freising etc. Unsren gunstlichen grus bevor fuersichtig und weis unssunder lieb Wir schicken hiemit die Ersamen Johannsen Tuerndel und Johannsen Simonis lerar gaistlicher rechten unser Raet und Tumbherren zu Freising zu dem Allerdurchlauchtigisten Romischen konig etc. unserm genedigisten herren als von unser und unsers Stifts Freising gerechtigkeit wegen Bitten wir ewch mit sunderm vleiss und gutem wolgetrawn so wir zu ew haben, Ir wellet gen seinen koniglichen gnaden ratlich hilflich und beigestendig sein als Ir dann bisher getan habt, damit wir und der Stift Freising zu rue frid und gemach komen, bey unser gerechtigkait beleiben auch groessers schadens und verderbens vertragen werden Daran erzaigt Ir uns gnam wolgevallen und danckperkait, das wir auch mit sundern gnaden gen ew er-kennen wellen wo sich das gebuert. Geben zu Freising an pfintztag vor dem Suntag Reminiscere Anno domini etc. xlvjto .

Source Fulltext: Peter Peusquens