Wir Fridrich von gots gnaden, Romischer kunig zuallenzeiten Merer des Reichs, Hertzog ze Osterreich, ze Steir ze Kêrnden, und ze Krain, Grave ze Tirol etc. Embieten den Erbern weisen unsern lieben getrewn .. dem Burgermaister Richter und Rate hie ze wienn unser gnad und alles guet. Wir lassen ew wissen, daz wir ain Ordnung und Stifft gemacht haben, wie es hinfur ewigk-leich und stêttigkleich gehalten sol werden, wann die priester zu sand Stephann und zu sand Michel hie mit dem heiligen Sacrament in die Stat oder vorstet geen, die kranchen damit zu beruchen, dartzu wir alle Jar vierundfunftzig phunt phenning, von der grondleichen Schatzstewr, so Ir uns Jêrleich zegeben schuldig seit, benennet haben, als dann das in aim andern unserm sundern brief darumb lauttend begriffen ist. Davon so emphelhen wir ew, von unsern und unsers lieben vettern kunig Lasslawes wegen, des vormund wir sein, und den wir innhaben, ernstleich und wellen, daz Ir von der obgemelten Schatzstewr Nun hinfur yedes Jars, zu dem obgemelten unserr Stifft vierundfuenftzig phunt phenning raichet und gebet, damit die beleibleich sey, und nicht abgee, So sullen ew dieselben vierundfuenftzig phunt phenning, an der vorgemelten Schatz-stewr Jêrleich abgetzogen werden. Mit urkund des briefs. Geben zu Wienn an freitag nach sand Symon und sand Jude tag, der heiligen zwelifpoten, Nach Kristi gepurd vierzehenhundert Jar, und darnach in dem funfundviertzigisten Jar, Unsers Reichs im sechsten Jar. Commissio domini Regis in cons(ilio).

Source Fulltext: Peter Peusquens