Ersam fuersichtig weys und lieb herren unser dinst wisset bevor Als vormaln an euch gelanngt hat das die Statt hie pegnadt und gefreyt ist das ain yeder gesessner Burger hie sein guet, bey ew, ze wienn gestten verchauffen und von jn chauffen mag darinne uns vormalen von ew irrrung geschê-chen ist und yetzund uns aber peswêrt mit dem das jr uns unser guet nicht verchauffen wellet lassen sunder es sey unserr yeder selb oder sein dyenner dapey und wann wir ew doch mit ewrm guet hie chaynerlay irrung nicht tuen Das lassen verchauffen wem jr das emphelicht, Bitten wir ew mit vleyss jr wellet uns soelech peswêrung noch irrung nicht tuen und uns unser guet lassen verchauffen wêm wir wellen und wêm wir das Emphelhen zeverkauffen das well wir gern umb ew verdienn. Beschêch aber des nicht So muest wir ew hie desgleichen mit ewrm guet hinwider tuen Ewr verschribnew anntwurtt latt uns pey dem gegenwurttigen unsern poten herwider wissen. Geben ze Judenburg an Eritag sand Matheus tag Anno domini etc. Quadragesimo quinto. Richter und Ratte der Stat zu Judenburg

Source Fulltext: Peter Peusquens