Cristoff von gottes genaden zu Denmarcken zu Sweden zu Norwyen der Wennden und der Gotten etc. Koenig Pfalentzgrave bey Reine und Hertzoge in Beren. Unnseren grus zuvor fursichtigen weisen lieben besunderen Uns haben die unnseren furpracht wie Ir ainem genant Hanns Frider-eckker in ewr Stat zu Wienn vergoennet und gestattet unnser Burger von Camb und annder die unnseren aus Beiren mit Iren leiben und guet zu hemmen und aufzuhallden, der doch zu uns oder den unnseren kainerlay pilligen spruch nit hat. Wann wir aber von den unnseren in Beren ver-nemen, das er groeblich mit auffsaetz und listikait gein uns, verprochen und misshanndelt, mit dem das er uns unnseren zolle, by ainer unnser staet in Beren zu Hembawr auf dem Noerckgaw verfueret Saffram und anndre zollperr guet hellichen dann gefuret und nit verzollt hat, als wir dem allerdurchluechtigisten fuersten herren Fridrichen Roemischen koenig zu allen zaiten merer des Reichs etc. unnserem lieben pruder und oheim auch dorumb yetzund geschriben haben. Dorumb der Friderekker und ein yeder der sulchs pfligt zu thuen einem herren leib und guet verfallen sein sol. Doch haben In die unnseren durch unnsere bevelhnusse, angesehen unnseren lieben Bruder und Oheim herrn Fridrichen Roemischen koenig etc. mit geringer straffe, durch-komen lassen. Herumb Bitten wir euch mit ernste, Ir wollet dem burger Friderkker die unnseren mit Iren leiben und guet, hinfuer in ewr Stat zu Wienn auch anderen amden In ewrem gepiete, nit mer behemmen und aufhaltten lassen, und sulchs, den ewren bevelhen, nit zuverhenngen. Hat aber der Friderekker zu den unnseren in Beren keinerlay zu sprechen. Dorumb wollen wir mit unnserem vitztumb in Beiren bestellen In fuerderlich recht widerfaren lassen vor unnseren Rêten in Beiren daran beweist Ir uns dancknemen willen das wir genaediclich gein euch erkennen und bedenncken woellen. Wuerdet Ir aber dem Friderekker vergoennen und darueber gestatten, die unnseren aufzuhallten oder Irrung zu thuen, des wir uns zu euch nit versehen So wuerde uns das kein gevallen sein, Sollten wir dann den unnseren vergoennen den eweren In der gleichen oder annderen sachen Irrung zuthuen têtten wir nit gerne. Geben zu Coppenhaven an Samptztage, vor unnser lieben frawen tage Nativitatis anno domini etc. quadragesimo quinto, unnser Riche des Dennischen etc. Im sechsten des Swedischen und des Norweyischen im vierden jaren. Ad mandatum domini Regis Erasmus Mainberger.

Source Fulltext: Peter Peusquens