Ersamen wolweysen und namhaften sunder gunstig furdrer und freundt unser freuntlich dinst zu aller zeit bevor Wir lassen ew wissen das wir dismals geprechen ettwas vast haben an Getraid umb daz der von Orberg unser abgesagter veindt, uns dy strassen auf Pehem und Merhern yetz abslecht und nyderlegt. Dadurch wir zu notturft mainen bey ewr Statmittel bestellen als auf zwaintzig oder dreyssig Mutt Getraidts Bitt wir euer weyshait mit allem vleiss Ir wellet uns dez vergunnen, und die unsern dew dadurch zu euer fursichtichait wurden chomen, daran furdern, als wir ew dez ganntz vertraun und umb das umb euch freuntlich verdienn. Ob daz also mag gesein, dez beger wir euer freuntliche verschribne annburt. Geben zu Prespurg an Sambstag nach Barnabe Apostoli Anno domini etc. quadragesimoquinto. Richter und Rate der Stat zu Prespurg

Source Fulltext: Peter Peusquens