Unnsern frewtlichen dienst zevor Ersamen weisen Als unser mitburger genant Hanns Prunner, von ainem ewerm mitwoner beswêrt ist worden an Recht und an Clag und nach pillichen sachen nicht gehanndlt, und auch denselben unsern mitburger an seim leib und gesunnd in merklich schaden pracht hat, als ew wol wissentlich ist, Pitten wir ewr weishait welle darob sein damit dem vor-genanten unserm mitburger von dem egenanten ewerm mitwoner umb sogetan sach genuog beschech. Daz wellen wir umb ew und die ewern in solhem oder merern altzeit gern verdienn, als wir das vor von der ewern wegen auch nach pillichen und rechtlichen sachen beweist haben und hinfuer altzeit gern tuen wellen. Geben zue der Newnstat, an freitag vor sannd Larentzen tag Anno domini etc. Quadragesimoquarto. Burgermaister Richter und der Rate der Stat zu der Newnstat

Source Fulltext: Peter Peusquens