Ich Wolfgang Piernesser Bekenn von wegen der zwaintzig phund phening, die ich auf Kuntzen Kantzler des pewglpekchen haws und Garten daran vor Schottentor auf der Allserstrass, zenagst Hannsen Holtzer haus gelegen, in der Burgerschrann, mit Gericht erlangt und behabt hab nach laut ains besiglten Gerichtbriefs, mir darueber gegeben, Und von wegen der acht schilling und zwair phening, die ich mit dem Rechten darauf gelegt hab, Daz ich den vorgenanten meinn Gerichtbrief und behabnuss mitsambt der geltschult, So mir der egenant Kantzler, nach laut des Satzpuechs schuldig ist, Dem erbern Symon Semelroeschen ledigclichn ubergeben hab, wissentlich mit dem brief. Also daz er nue furbaser, der obgenanten Summ phening, nach des Satzpuechs und Gerichtbriefs sag, von des egenanten Kantzler haus ledigcleich bekoemen und damit tuen und hanndln sol und mag, wes In verlust, an mein und meiner Erben Irrung und widersprechen ungeverlich. Mit urchund des briefs besiglt, mit der erbern, Ulreichs Hirssawer Statschreiber zu Wienn, und Erharts des Poeschendorffer, burger daselbs Aufgedrukchten Insigln, Die Ich zu-getzeugnuess der sach mit vleiss darumb gebetn hab, In und Irn erben an schaden. Darûnder Ich mich mit meinn trewn verbind stêtzuhalten daz vorgeschriben stet. Geben zu Wienn an Mittichen vor sand Stephans tag Inventionis Anno domini etc. Quadragesimo quarto

Source Fulltext: Peter Peusquens