Fridreich von gotes gnaden Roemischer Kunig zu allentzeiten Merer des Reichs. Hertzog ze Osterreich, und ze Steir etc. Erbern weisen, und lieben getrewen. Uns hat anpracht unser getrewer Hanns Mitterpacher, unser Burger hie in der Newenstat, Als Er Micheln Muttenhauser, auf unsern brief, hie zu recht verpoten, und darauf sich derselb Muttenhauser gen Im verschriben hab Im rechtens hie in unserr Burger schrann ze sein, umb solich Spruech, so Er zu demselben Mutten-hauser mainet ze haben. Mainest du..der Richter dich des beswaeret zu sein, nach dem und der benant Muttenhauser dein diener ist, und ob derselb Mitterpacher das recht nicht ze Wienn such, so wellest du In und sein guot hinfuer darumb bekumern und aufhaltten, des er sich beswaeret bedunkht. Also emphelhen wir ew ernstleich und wellen, daz Ir den benanten Mitterpacher gen dem egenanten Muttenhauser hie in der Newenstat recht suchen lasset, und Im daran kein Irrung nicht tuot, noch yemand anderm zetuon, oder darumb an sein leib, oder guot zu bekumern, und aufzehalten gestattet, Mainet aber yemand icht Spruech zu Im ze haben von der oder andrer Sachen wegen, der mag das suchen vor uns oder unserm Richter hie mit recht als sich gepueret. Das mainen wir gar enstleich. Geben zu der Newenstat, an Mittichen vor dem heiligen Ostertag. Anno domini etc. quadragesimo quarto, unsers Reichs im vierden jar. commissio propria domini Regis.

Source Fulltext: Peter Peusquens