Ersamen besundere Guenstige herren und foerderer Unsere willige dinste sint nu und allezeit in gantzen guten bevor ewer aller ersamkeit, der selbigen wolffart ist uns Stetes eyne besundere frewde zuhoeren. Als von uns selbist, dorawff lieben herren und frunde ist an uns komen klege-liche Sache von wegen des Erbaren Cunradis Kolner unsers Camergraffen von der Crempnitz vorlegende wye Er vor etlicher zeit vergangen durch seynen dyener ettliche mark Silber Auch ettliche Cleynodt Sylbereyne von der Crempnitz ken wyenn gsandt seynem schuldiger zubezalen, und auch zu kawffen zu sunderlicher notdurfft der Eegenanten Camer Crempnitz anligende in merklichem notze fromen und beistendikeit. Also synt des wolgebornen herren Cristoffs von Lychtensteyn dyener von Lunkenburk an unsers Camergraffens dyner komen und haben Sy berawbit solichs Silber unde Cleynodt oben beruert, wider Got und recht und an Redliche ursache das nicht sein solde, und beoben das allis betwungen, das sich de Egenanten unsers Camergraffen dyener musten vorschreiben, solicher Sachen an yn getan in keynerleye weise hynfur sollden gedenken clagen noch melden in gut noch in arge, das under Cristen lewten gar obil lawtet und unpillichen ist in aller werlde oren. Allso hat uns unser Camergraffe Cuntad Kolner Als pillichen angeruffen, vor yn zuschreiben ewer aller Ersamen guetikeyt, dy wir also mit unserm briff besuchen Als unsere lieben herren, zu den wir uns vor andern grosser Trewe vorsehen, durch unserer manigfeldiger dinste wille in nachkomenden zeiten zu wolgevallenn wider zuerzeigen, hyrinne mite zuteylen getrewlichen Ewern Rath Trost und Huelffe anzusohen weye unser Camer-graffe nicht also leichtiglichen zu schaden kweme unvordienter sachen, und ab wege dorynne mochte gesein, das solich gut genomen obenberuert wider moche gekart werden, wannen wir das zu mole grossen schaden genomen haben, und dye selbige Camer hat mussen feyeren, durch solicher notdurfft wille. Sunderlichen das auch dann ewer lewte zu wyenn, mit den unser Camer-graff zuthuen hat gehabt unbezalt bleiben, das ist an alle schult des vilgenanten Camergraffen Als dann vilpas wenn wir geschreiben moegen vorsochen ewer aller Ersamen weisheit, dy wir biten So wir hoegste fleisigiste und dinstlichste sollen, ewer aller liebe und gute welle myldeklichen in aller notdurfftigen Sachen wille hyrynnen zuteylen Solichen Trost Rath und Hulffe, das wir und unser Camergraffe nicht zu solichen Sschaden qwemen, das wellen wir stets ane alle abelassen getrewlichen wo Is sich wirt geporen wider verdinen, ken ewer aller Ersamkeiten unde ken allen ewern in eyme solichen adit vil in eyme grosseren. Geben ze Grane am Sonneobent vor dem Palmetag Anno etc. XLIIII°. Johan Gyskra von Brandis, des Allerdurchlauchtsten fuersten und herren herren Laslan kuniges ze Hungern Dalmatien Croatien etc. Hawptman und Groffe zum Sarosch.

Source Fulltext: Peter Peusquens