Ersam fuersichtig und weis besunder lieben und gut freunt, unnser freuntlich willig dienst alltzeit zuvor. Es komen zue eurer weißhait, unser Ratgnossen und gut freunt, Sigmunden Jegenreuter und Mertein den Aunpecken, den haben, wir empfolhen, ettwaz unnserer notturft, an ew zuwerben und bringen von uns, aigentlich unnderrichtet. Bitten wir eur fuersichtige weißhait mit ganntzem vleisse, was die zu disem mal, an ew werbent und bringent sein, in daz zugelauben, als unnsselbs, und ew so gutwillig darInne beweisen als wir ew des sunder getraun, und umb ew und dy eurn mit allem willen alltzeit gern verdien wellen. Geben an freitag vor dem Suntag Invocavit. Anno domini etc. XLIII° Burgermaister Richter und Rate der Stat ze Passawe.

Source Fulltext: Peter Peusquens