Wir Albrecht von gotes gnaden, Romischer Kunig zu allen zeiten Merêr des Reichs, ze Ungern, ze Behem, Dalmacien, Croacien etc kunig, und hertzog ze Oesterreich etc. Embieten den Erbern weisen unsern lieben getrewn..dem Burgermaister ..dem Richter dem Rat, und den Buergern gemaniclich ze Wienn, unser kunigleich gnaden und alles gut. Wan uns der kunig von Polan, und sein Bruoder, von unsern lannden, und leuten wider recht mainet ze dringen, und unsere lannd ze uberziehen, und die mit Rawb, und Prant zu verderben und zewuchsten als er nu an manigen ennden in unserm lannd in der Slesy hat getan, und an dem zug ist sich gen Mêrhern und gen Osterreich zefuegen. Dadurch unser lantleut in Merhern nu habent angehebt ain veld zemachen So haben wir auch unser lieben getrewn herrn Ritter und Knecht in Oesterreich auf ainen be-nanten tag gen Laa gevordert. Davon emphelhen wir ew und wellen ernstleich. daz ir ew auch darzue schikhet, mit wer harnasch und allen andern notduerften wan ir aufgevordert werdet. daz Ir dann an vertziehen berait, und auf seit, und an solch stet dahin man ew vordêrt koemet, unsern haubtleuten gehorsam seit, und den egemelten unsern und ewern veinden zuwidersteen helffet, nach ewrm pesten vermuegen, als wir ew des sunderwol getrawn, und als Ir uns, ew allen, und dem lannd des schuldig seit, das wellen wir gnedicleich gen ew erkennen. Geschech aber des wir doch nicht getrawn, daz ettleich widersessig, und in solhen grossen notduerften ungehorsam funden wurden, die wolten wir swêrleich darumb pessern. Auch ist unser maynung daz Ir solch unser schreiben offentleich lasset berueffen, damit das an yeden man gelange. Geben an Mitichen vor aller heiligen tag. Anno etc. tricesimo octavo, unserr Reich des Romischen, ze Ungern und ze Behem etc. im ersten jar, under unserm Insigel, das wir in unserm furstentum Osterreich geprauhen. com(missi)o domini Regis l(itte)rat(orie) fact(a)

Source Fulltext: Peter Peusquens