Ich Susanna Hannsen des Prugkner hausfrau Vergich fur mich und all mein erben und tuen chund offenlich mit dem brief, das mir die Erbern Lienhart Lehenholtzer Amptman in der Schefstrass ze Wienn und Stephan der Meichsner burger daselbs ausgericht, und gegeben habent drewhundert und dreissig phunt wienner phenning an den sibenhundert und funfundsibentzig phunt phenningen die mir fraw Elpeth Danielen des Hohenkircher hausfraw schuldig worden ist, dafuer Sy mir Ir haus mitsambt dem MetRecht in der wolzeil ze wienn gelegen, mit andern Iren guetern zuphannt gesatzt hat nach lautt der Gruntpucher und Satzpucher uber dieselben Gueter und Grunt, und nach Innhaltung ains geltbriefs den Ich vor Ir darumb hab. Davon sag ich fur mich und all mein erben die obgenanten Lienharten Lehenholtzer und Stephan den Meichsner und der egenanten Danielin erben der vorgenanten dreyerhundert und dreissig phunt phenning an dem obgenanten geltbrief und verphentung quitt ledig und los, und sag auch darzu frey und ledig, das obgenant haus mitsambt dem Metrecht, das mir in der Stat ze Wienn Satzpuech verphenndt und verschriben ist, das ich noch mein erben noch nyemants von unserr wegen zu demselben haus und Metrecht dhainen zuespruch mer haben wellen in dhainer weis an alles gevêr. Mit urchund des briefs besiglten mit meinem aigenn aufgedrugkchtem Insigl. Dartzu hab ich mit vleis gepeten den erbern Gabrielen den Grevenperger burger ze Wienn das er der sachen getzeug ist mit seinem aufgedrugkchtem Insigl, Im und seinen erben an schaden Geben ze Wienn an Montag nach sand Veits anno domini etc. Tricesimo octavo.

Source Fulltext: Peter Peusquens