Wir Kristan von gotes gnaden Abbt zu Melkch Bekennen das fur uns kome Hanns Wuerffel und gab uns zu erkennen wie er seiner hausfrawn Klara her Hannsen des Rewtter tochter vermacht hiet die hernach geschriben stuekch und gueter die von uns und unserm Gotzhaus lehen Rurent, mit-sambt andern guetern, die nicht von uns lehen sind in solher beschaiden ob geschêche das sew kinder mit ein ander gewunnen, dorauf sullen dannn die benanten stukch und gueter erben und gevallen erst nach Ir baider tod wer aber das er Ir kinder hinder Im liezz die sew baide eleich mit ein ander gehabt hietten das die mit tod abgingen und ee ersturben wenn die obgenant sein hausfraw und ee Si zu Iren beschaiden jarn kêmen und vogtper wuerden oder ob er Ir nicht kinder hinder sein liezz die sew mit ein ander gehabt hietten so scholten die benanten stuekch und gueter ledikleich bey Ir beleiben und damit schaffen allen Iren frumen, und bat uns mit fleizz, das wir darzu unsern gunst und willen geben und auch das bestetten wolten, das haben wir getan und haben darzu unsern gunst und willen gegeben und auch das bestêtt was des von uns lehen Ruert wissentleich in krafft des brieffs was wir doran zu Recht und pilleich bestêtten sullen oder muegen Als solhes gemechts lehens und lanndes in Oesterreich Recht ist Doch uns und unserm gotzhaus an der lehenschafft unvergriffentleich Und sind das die stukch und guter Item von erst zway tail getraid zehent auf dreytzehenthalben lehen gelegen ze Honestorff enhalb des pachs zu veld und ze dorff Item zway tail getraid zehent auf zwayundfunfftzigk jeuch akchers gelegen ze Minkchendorff und ainen zehent auf vier weingarten gelegen ze Medling gelegen bey der urtail mit urkundt des brieffs mit unserm klainern Anhangunden Insigel besigelt. Geben ze Wienn an freytag vor sant Merttentag Nach Kristi gepurdt vierzehenhundert Jar und darnach in dem Sibentunddreysigisten Jare.

Source Fulltext: Peter Peusquens