Ich Fridreich von Pettaw Obrister Marschalh in Steyr Bekenn mit dem brief, das Ich Petern und Joergen gepruedern den Schuechlern, und allen Iren erben, Suen und toechtern ze Rechtem lehen gelihen hab und leib in auch wissentleich mit dem brief, von erst vier hoef gelegen in dem Pruel, an dem Kueperg, in Medlinger pharr. Item an ainen halben dreyssig emmer perkrecht gelegen an dem Aichperg bey dem Kueperg, und als vil perkrecht phening..und dartzue newn schilling und zehen phening gelts gelegen auff behausten holden, mitsamt den klain rechten darauff. Ich hab In auch die vorgenanten hoef perkrecht und gult mit allen Iren zuegehoerungen und Rechten verlihen, was Ich In daran Rechtleich leihen sol und mag, nach lehens recht in Oesterreich. Mit urkund des briefs, versigelt mit meinem aignen anhangenden Insigl. Der geben ist nach Christi gepurt viertzehenhundert und in dem Siben und dreyssigisten jar, an eritag vor sant Michels tag.

Source Fulltext: Peter Peusquens