Wir Swester Kathrey die Langin Abttessin des frawnklosters datz Sand Niclas vor Stubentor ze Wienn und wir der Convent gemain daselbs Bekennen Als uns weilent der erber man Ott der Weiss under anderm seinem geschefft So er hat getan geschafft hat ainen weingarten gelegen am klaytzingerperg des ein halbs Jeuch ist und darzu fuenftzig phund wienner phenning umb ainen ewigen Jartag den wir Im jêrleich an Mitichen in den Osterveirtagen nach unsers ordens Syt und gewonhait begen solten nach lautt seins geschêffts daz in dem Statpuch ze wienn gechriben steet, und wan wir aber den yetzgen Jartag an Mitichen in den Osterveirtagen nach Inhaltung desselben Otten Weissen geschêfft willig gewesen wêrn ze begeen des wir aber von der Hochzeitleichen zeit wegen der Ostern nicht haben muegen getuen wan wir mit anderm gotsdienst So denn zu derselben zeit nach aufsatzung der kirchen gehoeret bekumert und gepunden sein Habend uns desselben Otten Weissen geschêfftlêut der erber Briester her Hanns von Pusêwl und die erbern weisen Hanns Scharffenperger kellermaister in Österreich Hainreich Franck Wolfhart von Pusêwl all drey dietzeit des Rats der Stat ze Wienn Niclas Zingk Burger daselbs und die erber fraw Dorothe des egenanten Otten des Weissen witib den er sein geschefft auszerichten empholhen hat den obgenanten tag nach unserm begern und fleissiger gebet willen umbgelegt auf den nagsten Mantag nach dem Suntag als man ze Ambt singet Quasimodogeniti und habent uns auch darzu zu unsern handen ubergeben und ausgericht den obgenanten weingarten und die fuenftzig phund wienner phenning so uns gegeschafft sind als vor beruert ist Und darumb so haben wir uns mit wolbedachtem muet und mit gemainem veraintem Rat zu der zeit da wir es wol getuen mochten gegen den obgenanten Otten des Weissen geschefftleuten vervangen wissentleich mit dem brief daz wir und unser Nachkomen dem yetzgenanten Otten dem Wissen den egemelten ewigen Jartag Jêrleich an Mantag nach Quasimodogeniti in dem obgenanten unserm kloster begeen und ausrichten sullen und wellen des nachts mit ainer gesungen vigiln und des morgens mit ainem gesungen Selambt und mit aller anderer schonhait und zier als denn ander Jartêg in dem egenanten unserm kloster ze begeen sit und gewonhait ist und als er uns das auf unser gewissen getraut und empholhen hat ungeverleich und des zu ainem warn urkund geben wir In den brief besigelten mit unser vorgenanten Swester Kathrein der Langinn Abtessinn und des Convents gemain anhangunden Insigeln. Geben ze Wienn an Mitichen nach Sand Kathrein tag Nach Kristi geburd viertzehenhundert Jare darnach in dem Sybenundzwaintzigistem Jare.

Source Fulltext: Peter Peusquens