Ich Hanns Zingk der Elter Vergich fur mich und all mein erben und tun kund offenleich mit dem brief Daz Ich mit gutem willen und wolbedachtem muet zu der zeit, da ich es wol getuen mocht, und mit hannden der Erbern weisen hern Pauln des Wurffels zu den zeiten Burgermaister und des Rats gemain der Stat ze Wienn Recht und redleich ubergegeben hab wissentleich mit dem brief meinem lieben Sun Hannsen dem Zingken Burger ze Wienn, mein haus gelegen in der Munsser-strass daselbs gegen Niclasen des Zingken meins vettern haus uber zenegst des von Eselarn haus an ainem tail und stosset mit dem andern tayl in den kamerhof In solher maynung daz der vor-genante mein lieber Sun Hanns Zingk und sein erben, das vorgenante haus gantzes mit allen gemechen und rechten als das von alter in purgkrechtsgewer herkomen ist Nu furbaser ledich-leichen und freyleichen haben und allen Irn frumen damit schaffen schullen und muegen mit verkauffen versetzen schaffen machen und geben, wem sy wellen, und alles damit tuen und hanndeln das In am pesten fueget oder wolgevellet an mein meiner erben und menichleichs von unsern wegen Irrung und hindernuss angevêr Und daz die uebergab also stêt und unzebrochen beleib Daruber zu ainem warn urkund, gib Ich In den brief besigelten mit meinem anhangundem Insigel und mit der vorgenanten Stat ze Wienn anhangundem GruntInsigel. Geben ze Wienn, an Sambstag sand Matheus abent des zwelfboten Nach Christi gepurd viertzehenhundert Jar. Dornach in dem Sybenundzwaintzigistem Jare.

Source Fulltext: Peter Peusquens