Wir Paul der Wuerffel zu den zeiten Burgermaister, und der Rat gemain der Stat ze Wienn, Bekennen von des ligunden venster wegen, daz aus unsers Statschreiber kamer get uber den gang, als man aus dem Pharhof sand Ottenhaim auf die parkirchen daselbs geet, und daz derselb pharrer durch unsers Statschreiber fleissiger bet willen hat erlaubt zemachen, daz dasselb venster nur von gnaden und nicht von rechtens wegen aus des egenanten unsers Statschreiber kamer geen sol. Also ob der egenant Pharrer, oder sein nachkomen icht pawn oder, ob Si des nicht lenger dulden wolten, daz denn Sy das egenant venster daran nichts sol hindern noch irren sunder wider vermacht werden, wenn Si des zue solhen Irn notduerfften begernt ungevêrlichen. Mit urkuend ditz briefs besigelt mit der vorgenanten Stat ze Wienn klainem anhangundem Insigel. Geben ze Wienn an Montag Nach Oculi in der Vasten Nach kristi gepuerd viertzehenhundert jar darnach in dem Sybenundzwaintzigisten jare.

Source Fulltext: Peter Peusquens