Wir Albrecht, von gotes gnaden, Hertzog, ze Oesterreich, ze Steir, ze Kêrnden, und ze Krain, Marggraf ze Mêrhern und Grave ze Tirol etc. Bekennen, daz wir, den erbern, unsern lieben andêchtigen Simonen kapplan, zu Ottenhaim zu Wienn, und unsers gnedigen herren .. des Roemischen etc. kuenigs, Schreiber in seiner kantzley, durch desselben Simonen erberkait, und verdienen willen, zu Capplan, und In, und die egenant sein kappellen, mitsampt iren leuten und guetern in unser sunder gnad und scherm genomen haben, und nemen auch wissentleich mit dem brief, und mainen, daz Si nyemant dringe noch beswêr, in dhain weis an Recht. Davon gepieten wir, unsern getrewn lieben, unserm Burgermaister .. dem Richter und dem Rat zu Wienn, die ye zu zeiten sind, und allen andern unsern Amptleuten und undertanen, den der brief getzaigt wirt, und wellen ernstleich, daz Si den egenanten Simon, sein Capellen, und ir leut und gueter, bey disen unserr gnad, und scherm lassen gêntzleich beleiben, und Si wider Recht in dhain weis, nicht beswêrn, wan wir das ernstleich mainen. Mit uerkunt des briefs. Geben zu Wienn an phintztag nach dem Ebenweichtag Nach Kristi gepurde viertzehenhundert Jar. Darnach in dem Sibenund-zwaintzigisten Jare. d. d(ux) in cons(ilio).

Source Fulltext: Peter Peusquens