Wir Mertein Teicher Hensel Greusser Hanns Swab muentzerschoepfen in den smiden dornach Wilhalm Schick Hanns Wunderwein Thomas Alder schoepfen in dem Preghaus Bekennen offen-leichen mit disem gegenwuertigen brife allen den, die nu sein oder hernach kuenftig werden, das der Erber Nicolae Odrowitz uf dem tendelmark hat gekauft Im und seinen nesten erben ein virteil eines lones umb zwaintzig schok grosser Prager pfenning wider den Czobyslaw seins lons recht und redleich in dem Preghaus zu rechen mit allem dem nutz der von einem virteil eines lones gevellet und kumen mag und schol auch der egenante Czowyslaw dem vorgenanten Nicolae Odrowitz und seinen nesten erben dasselbe virteil eines lones vorarbaiten als ein recht ist alle wochen an allen crig, und auch geben wenn man abgerechent hat, und wo des der Czobisslaw nicht entut So ist er dem vorgenanten Nicolae und seinen nesten erben bestanden mit seinem andern virteil seins lons an alle widerred und wenn got beschert dem Czowysslaw das er dem egenanten Nicolae und seinen nesten erben ein ander virteil eins lons kauft auf einen erbern knappen auf die fumfund-sibentzig marck So schol des Czowislaw virteil seins lons wider frey und ledig sein, und wenn got gepeut uber den Czowyslaw So gibt man dem Nicolae Odrowitz sein nesten erben oder wer den gegenwurtigen brif mit recht hat, achtzehen marck und zwenundviertzig gros von den ersten pfenningen di do gevallen von den fuemfundsibentzig marcken dy man dem Czowysslaw gibt nach seinem tod und zu einer bestetigunge diser sache hab wir vorgenante Schopfen unser paide Insigel gehangen an disem gegen-wurtigen briff der do geben ist noch cristi gepurd virtzehenhundert jar dornach in dem dreytzehentem jar der dominiken Gaudete.

Source Fulltext: Peter Peusquens