Ich Dietreich der Prenner zu den zeiten Muennzzmaister ze Wienn, Vergich offenleich mit dem brief, das fuer mich chom do ich saz an offem gericht, fraw Dorothe, Niclas hausfraw des Wazzer-vogel, und klagt mit vorsprechen, hintz Hannsen dem Oesterreicher dem Goltschmid, umb Sechtzig phunt wienner phening, die er Ier gelten solt, und fuer dazselb Ier gelt hiet er Ier ze phant gesatzt sein haws, gelegen in der Chaernêrstrazz ze Wienn, und die pranntstat dabey zenagst Hainreich haws des Parlier als es in der Stat Gruntpuech ze enier gedechtnuezz geschri-ben stuend, und chlagt nach desselben puechs sag, alsverr, untz Si Im nach allen fuerboten und ze wizzent nu, das egenant sein haws mit sambt der pranntstat dabey Ier phant mit rechten nottai-ding anerlangt und behabt vor offem gericht. Do ward gevragt was recht waer, do geviel mit vrag und mit urtail, Mir solt die vorgenant fraw Dorothe mein recht geben, das hat Si getan, und solt ich Sey des vorgenanten hawses, und der pranntstat dabey Irêr phant, gêntzleich gewaltig machen und an die gewer setzen, daz hab ich auch getan, Also daz Si mit demselben haws und der pranntstat dabey Iren phanden, fuerbaz allen Iren frumen schaffen sol und mag, mit ver-kauffen oder mit versetzen wem Sy well, an allen irresal, Soverr daz Si des obgenanten ires geltes alles, gantz und gar davon verrichtt und gewert werde. Und solt ich ier des mein urkund geben. Und des ze urkund gib Ich Ier den brief, versigilten mit meinem anhangundem Insigil. Der brief ist geben ze Wienn, Nach Kristi gepurt Viertzehenhundert Jar, darnach in dem Ersten Jar, des nagsten Montags vor sand Thomas tag, des heiligen zwelifpoten.

Source Fulltext: Peter Peusquens