ex deliberatione Baronum Sigismundus dei gratia Rex Hungarie, Dalmatie, Croatie etc. Marchioque Brandenburgensis etc. fidelibus suis universis Prelatis Baronibus Comitibus, Castellanis, Nobilibus, ipsorumque Officialibus. Item Civitatibus et liberis villis ipsarumque Rectoribus Iudicibus et villicis quibus presentes ostenduntur Salutem et gratiam. Licet nos pridem fideli nostro Petro dicto Zekul mercatori de Owar ac fratri eiusdem, et nonnullis civibus nostris de dicta Owar et Iauriensi de speciali nostra licencia annuerimus, ut ipsi quoslibet mercatores de Wyenna, et de Austria, ac res mercimoniales eorumdem, ratione quarumdam iniuriarum et gravaminum ipsis per nonnullos in Austria illatarum, ubilibet hic in regno possent per vestros facere arrestari, prout etiam iam aliquos hic in regno cum rebus suis arrestari procurarunt. Tamen quia nos una cum Prelatis (et Baronibus) regni nostri decrevimus, ut nos quindecimo die post felicem nostram reversionem de exercitu, quem contra nonnullus nostros et regni nostri aemulos instauravimus, ad confinia regni nostri Hungarie certos nostros Barones destinabimus. Et ipse dominus dux similiter suos certos Barones, ad limites Austrie, certis die et loco conveniendos debeat destinare, ad habendos tractatus et colloquia pro emendandis satisfaciendis et reformandis iniuriis dampnis et nocumentis, ac displicentiis regnicolis nostris et suis communiter hinc inde in alterutrum illatis et irrogatis. Ideo vestre universitatis fidelitati, et cuilibet vestrum specialiter firmiter precipiendo mandamus, quatenus nullum ex predictis mercatoribus de Wyenna et de Austria, quousque prefati tractatus et colloquia concludentur, ad quorumcunque mercatorum seu aliorum fidelium nostrorum et signanter dicti Petri et fratris sui instantiam, nisi speciale aliud contrarium intervenerit, arrestare seu quovismodo impedire audeatis, seu presumatis, arestatos etiam de presenti tam in civitate Budensi, quam Iauriensi et in Owar, ad fideiussoriam cautionem facimus relaxare. Tali conditione interiecta, quod in casu quo nostri ac dicti domini Alberti ducis barones et consiliarii in dictis tractatibus et colloquiis non possent taliter concludere, quod nobis utrim-que esset acceptandum aut placeret, quod tunc iidem mercatores de Wyenna vel de Austria, per ipsum Petrum ac fratrum suum necnon alios nostros regnicolas arrestati in predictis nostris civi-tatibus Budensi, Iauriensi ac in Owar, se cum tanta quantitate rerum et bonorum, qualium iam existunt arrestati, propriis in personis octavo die post consummationem ipsorum tractatuum non moniti sine aliqua difficultate et dilatione se statuere debeant et teneatur reputare. Datum Bude feria sexta proxima post festum beati Bartholomei Apostoli. Anno domini Millesimo CCCmo LXXXmo octavo.

Source Fulltext: Peter Peusquens