Ich Ott von Eslarn und ich Elspet sein housvrowe wir veriehen und tun chunt allen den di disen prief lesent oder horent lesen . die nu lebent oder di her nach chunftig sint . daz wir mit unserr erben guetem willen und gunst . mit verdachtem muet mit gesampter hant ze der zeit do wir ez wol getun mochten . redleichen und recht verchoufft haben unsers rechten purchrechtes funf phunt wienner phenning gelts . die da ligent auf hern Eberharts house hern Ulreichs aydem des Zendleins dem got genade . daz da leit an dem Graben . zenechst der Ernstinne house der vezzelsneiderinne. Die selben funf phunt purchrechtes hab wir verchouffet und geben nach unserr pesten vreunt rat und ouch mit alle dem rechten als wir seu in purchrechtes gewer her pracht haben. und als wir seu auch emalen gechoufft haben . wider den vorgenanten erbern man . hern Eberharten . des Zendleins aydem dem got genade und wider sein housvrowen vroun Preiden und ir erben . als ir prief sagent di seu uns dar umbe geben habent versigelten mit irem Insigel . und mit irs Grontherren Insigel des erbern herren Apt Mauricii von den S(ch)otten ze wienne und mit hern Niclas insigel von Eslaren . und di selben prief hab wir durch pesser sicherhait und auch ze rechtem scherm in geantburt und in geben mit alle dem recht als wir seu inne gehabt haben . uber di vorgenanten funf phunt purchrechtes di wir verchoufft und geben haben umb zwaintzich march silber wienner gewichtes ie zwen und sibentzich grozze pehemischer phenning fur ein igleiche march . der wir gentzleichen und gar verricht und gewert sein. dem erbern manne hern Chunraten von Brunne hern Dietreichs aydem von Olmuntz und seiner housvrouen vroun Chunigunden und ir paider erben . ledichleichen und vreileichen zehaben . und furbaz allen iren frumen ob mit zeschaffen verchouffen. und versetzen und gebem swem seu wellen als ez in aller peste chom und fueg an allen irrsal und an allen chrieg also mit auzgenomner rede. Daz in . der vorgenant her Eberhart oder sein erben oder swer daz vorgenant house nach in besitzet ledichleichen alle jar dienen sullen daz vorgenant purchrecht ze drin zeiten in dem jar. ze weinachten. an sand Georgentag . und an sand Michels Tage . mit alle dem rechten als man an deu purchrechten dient in der stat ze Wienne . also mit sogetaner we(be)schaidenhait . ob daz geschaehe . daz der Egenant her Eberhart des Zendleins aydem dem got genade oder sein housvrowe vrou Preide und ir paider erben . oder swer das vorgenant house nach in besitzet . dem vorgenanten hern Chunraten von Brunne und seiner housvrouen vroun Chunigenden und iren erben . di Egenanten funf phunt purchrechtes nicht endienten also daz in dar umb ze chlagen gescheche . so schol in der vorgenant her Eberhart des Zendleins aydem und sein erben . oder swer daz selbe vorgenant house nach in besitzet alles des rechten und gelubes gepunden sein ze laisten . als an dem prief geschriben stet . den der vorgenant her Chunrat von Brunne und sein erben inne habent . und den ich in vorgenanter Ott von Eslaren und mein housvrowe vroue Elspet und unser erben in geantburt geben haben . und daz di rede stet sei . dar uber so gib ich in disen brief ze einem offen urchunde diser sache versigelt mit meinem Insigel . und mit hern Perchtolts Insigel des Pollen hinder der slachstuben . den man des gepeten hat daz er der sach gezeug ist mit seinem Insigel . und ist gezeug her Ulreich der Polle . und her Jorg an dem Chienmarcht. Der prief ist geben nach Christes gepurde dreutzehen hundert iar in dem acht und zwaintzichistem jar . dar nach an sand Lucien Tag.

Source Fulltext: Peter Peusquens