Elizabeth dei gratia Regina Ungarie Polonie . Dalmatie etc. fidelibus suis universis Praelatis, Baronibus, Comitibus, Castellanis. Nobilibus, ac aliis cuiusvis status et conditionis hominibus, tam in terris quam super fluvio Danubii ubilibet usque viennam, et infra Budam Tributa habentibus et tenentibus, nostrisque et eorumdem tributariis, quibus presentium continentia fuerint manifesta. Salutem et gratiam. Cives et Mercatores Ducum Austrie, fratrum nostrorum, nostre maiestati detexerunt gravi cum querela, Et dum ipsi cum rebus et mercibus eorum consueto more de Austria, in Regnum nostrum Ungarie, versus predictam Budam et Albam regalem, venirent et proficis(s)cerentur et ad loca Tributorum nostrorum et vestrorum pervenirent, vos de veris et iustis tributorum vestrorum, pecuniariis solutionibus non contenti, ipsos ad superfluam et indebiti Tributi solutionem de eorum rebus et mercibus faciendam compelleretis ymmo quadam abusiva consuetudine adinventa, diversa munera Piper scilicet Lanceas Cultellos, et de Sindone, ac de aliis generibus specierum vobis attribui et propinari eosdem astringere essetis assueti, et ut plus, de huiusmodi ipsorum Bonis percipere possitis diversas Calum(p)nias per arestationes et resolutiones Curruum ipsorum eis imponere non cessaretis per quod factum ipsi grave dam(p)num paterentur. Supplicantes exinde domini nostri Regis consortis karissimi, et nostre maiestatibus, ipsis providere de remedio opportuno, et Nos itaque huiusmodi querimoniis, et humil(l)imis supplicationibus ipsorum Civium Mercatorum de Austria perceptis et exauditis Potissime pro eo ut dicti mercatores viennenses cum eorum rebus et mercibus, ad dictum nostrum Regnum ferventius (frequentius) et securius concurrant, eisdem duximus annuendum, ut ipsi a modo in antea premissa munera et propinas tam scilicet piper quam etiam Lanceas vel Cirotecas seu de Sindone, sive de aliis generibus specierum quicquam tributariis predictis, absque eorum bona voluntate dare vel propinare non teneantur, ymmo ab huiusmodi propinis et exhibitione honoris dictis Tributatriis, absque ipsorum benivolentia faciendis, omnino ex presenti nostri annuentis sint expediti. Sed de ipsorum rebus et mercibus veris et iustum Tributum, cum pecunia prompta Tributaris solvere et expedire debeant prout fuerit opportunum mandamus ideo, vestre universitatis fidelitati firmiter et districte per presentis quatenus deinceps predictos mercatores et cives de Austria pro muneribus et propinis superius nominatis sicut hactenus fecisse dicimini contra formam premisse nostre commissionis nullo modo agravare vel molestare presum(pm)atis sed sitis contenti de solutionibus veri et iusti Tributi, vestri modo superius declarato exigere debentis ab eisdem, quibus habitis ipsos semper et continue libere, et absque aliquali impedimento cum dictis eorum rebus et mercibus abire premittatis, de locis Tributorum nostrorum et vestrorum predictorum. Et aliud sicut nostram gravissimam indignationem, incurrere formidatis non facturi in premissis Alioquin deliberavimus nostris mandatis contrarium facientis pena debita puniendos. Datum in Chepel in festo beati Johannis ante latinam portam Anno domini Mo CCCmo Octuagesimo primo.

Source Fulltext: Peter Peusquens