Ich Chunrat di weil techent ze Krembs vergich offenbar das ich den erbern geistlichen herren, dem abbt vnd der sampnung des chlosters ze Wilhering alle iar jarleichen an sand Georigen tag schol raichen vnd dienen in iren hof vnder den Weintzurln ze Krembs zu rechtem purkrecht von dem halben tail des hofs gelegen ze Nevndorf, der weylend Steffans des Veldrichter ist gewesen, zwelift halben pfenning wienner munsze vnd an sand Michelstag von den äkchern, die hinden daran stossend, funftzehen pfenning, vnd an dem selben tag von dem Prunngarten, der an di Haid stozzet nach den vorgeschriben äkchern, drei phenning auch wienner munsse. Tät ich des nicht oder wer den hof inne hat, so schullen die vorgenanten herren alle die recht darauf haben als auf anderm purkrecht recht ist in O^esterreich. Vnd darvber gib ich in disen brief versigelten mit meinem anhangunden insigel. Der prief ist geben drewtzehen hundert jar darnach in dem zway vnd funftzigisten jar an sand Vlrichstag.

Source Fulltext: OÖUB 7 (Wien 1876) S. 288f., Nr. 284