Ich Vlreich von Tieming, vnd ich Diemut sein housurouwe, vnd vnser paider erben veriehen offenleich mit disem brief vnd tun chunt allen den, die in sehent, oder horent lesen. Daz wir den beschaiden laeuten, Fridreichem dem winter, vnd vro Christein seiner housurouwen vnd ir paider erben mit woluerdahtem mut, czder czeit do wirz wol getun mohten, versatzt haben mit vnsers gnaedigen herren Abt Ditmars von Seidensteten hant, den czehent an der puhen. besueht vnd vnbesueht, als wir in selb inne haben gehabt, für sehs pfunt phenning wiennaer munze, die sy vns beraitt gelihen habent, also beschaidenleich, daz sy den vorgenanten zehent, mit allen nutzen, als êgeschrieben ist, inne schullen haben, nv von Sand Georien tag, der schirist chûmt, vber fûmf iar. an alle losung, fuer die selben fvmf iar schûllen wir alle iar losen an Sand Georien tag, vnd schullen ouch des satzes ir gwer sein an aller stat, wo in des not geschiht, nach Landes reht in Oesterreich, Dar vber czu einigem sihtigen vrchunde. vnd czu einem waren getzeug diser sache, geben wir in disen prief. versigelten mit meinem Vlreichs von Tieming anhangundem Insigel. Des sint getzeug, Pilgreim der tiemingaer von Protsdrvm mein prueder, Ludweig der tiemingaer von Leitten, vnd ander erbaer laeut genueg, Daz ist geschehen. vnd der prief geben datz Seidensteten, an aller Heiligen tag, do man von Christes gepurde czalt Drevtzehen Hundert iar, dar nach in dem ayn vnd viertzgisten iar.

Source Fulltext: RAAB, Seitenstetten (=FRA II/33, Wien 1870) S. 215