Ich Alber von Volchenstorf vnd ich Margret sein hausuraw. wir veriehen vnd tuen chund allen den. di disen prief sehent oder horent lesen, di nv lebent oder her nach chunftig werdent. daz wier mit verdachtem muet vnd mit vnsers sunes Otten guetem willen. ze der zeit. da wir iz wol getuen machten. haben geben dem Gotshaus datz vnser vrauen ze seytensteten di manschaft, di wier haben an dem hof. der da leit ob der Chirichen ze piberpach. also daz daz selb gotshaus vnd di samnung schullen haben alle iar ein selmesse des nachsten mentags nach sand Cholmans tag. di beil vnd daz wier leben. swan wier auer nicht mer sein. so schol man iz pegen furbaz an vnserm iartag ebigleich. swan der sci. vnd schol auch vnser gedenchen an aller der stat. vnd mangedencht der lemtigen vnd der toten nach des vargenanten gotshaus gewanhait. wer auer daz. daz di vargenant samnung der vargenanten gelub nicht stet wolten behalten. so schol di egenant manschaft her wider geualn an vns oder an vnser erben. vnd daz dise red stet vnd vn zebrochen beleib. dar vm so gebe wier in disen prief, versigelten mit vnserm insigel. Der prief ist geben nach Christes gepuerd dreutzehen hundert jar. dar nach in dem neun vnd dreizkistem jar. an der ainleftausent magt tag.

Source Fulltext: RAAB, Seitenstetten (=FRA II/33, Wien 1870) S. 209-210