Ich. Ditreich Schench von Tobra vergich offenwar an diesem brief, vnd tvn chvnt allen den, die sechent oder horent lesen, daz ich mein lechen auf dem pvchel. da arnolt auf gesezzen ist. daz mein rechtz aigen gewesen ist. ze chovffen gegewen han, dem erwern herren apt Chvnraten datz Seytensteten vnd dem selwen Goteshaus vmb aindlef pfunt pfenning, mit meiner hovsfrowen vron Chvnegvnten. vnd mit meinz svns Ditreichez gutlichem willen, ledichleichen vnd an allen chrieg. wer aver daz iemen daehain ansproch oder dehain recht an dem leben hawen wolt. der sol dem vor genanten herren apt Chonraten von Seytensteten vnd dem selben Gotzhavs zwaintzig pfunt pfenning gewen. vnd sol sich der selb dez lehen vnder winden, geschiecht auer dez niht. So sol er vnd daz Grotzhavs daz selbe lechen haben ewichleichen, dez ich Ditreich Schench vnd mein housfrowe ver Chvnegunt vnd mein svn Ditreich sein gewer sin vor allem recht. Daz daz gelube stet vnd vnzebrochen beleib. gib ich Ditreich Schench. dem erbern herren apt Chvnraten datz Seytensteten vnd dem selben Gotzhaus disen brief zeurchunde. bestetigt vnd gevestnet mit meinem Insigel. vnd sint dez gezevg. her Heinrdch von Horawe. Ditreich sein Svn. Fridreich vnd Vlreich die pavzzen. Ditreich von Erwing. Alram der Stiller. Frideraich der Hofmaister. Ekkel der chelner. Daz ist geschehen. da von christes geburde ergangen sind tavsent iar. drev hvndert iar. dar nach in dem acteiden iar. an der herren tag primi et feliciani.

Source Fulltext: RAAB, Seitenstetten (=FRA II/33, Wien 1870) S. 143-144