Ich her Lutweickh von zelking. vnd min bruder her Ott von Schonekk tvnne chvnt allen den. di disen brif ansehent oder horent lesen. daz wir einen hof hettet pei Zelking datz Wolfoltzdorf cze rechtem lehen von dem goteshaus datz Sytensteten, vnd haben den selben hof mit verdachten muet vnd mit gutem willen vnser hausvrowen vnd vnser chint vnd mit vrevt rat, auf gegeben vnsern herren Apt Chvnraten von Sytensteten vnd seinem goteshaus, vmb seczich pfvnt pfenning wienner munz, mit alle dev. vnd dar zu gehort, iz sein echer, wisen, holtz oder haide, zedorf. zeholtz vnd ze velde. besucht und vnbesucht. swaz wir da haben mit voitai vnd mit allen dingen, vurpaz ledichleich ze haben. an alle ansproch. Wer auer. daz daz vor genant goteshaus iemen wolde beswaren mit chainer slacht ansproch vmb den selben hof. so sulle wir sein gewer sein. vnd daz daz stete beleibe. dar vmb geb wir dem vor genanten Apt vnd seinem goteshaus disen brif besteting mit Vnser paider insigel. Daz ist geschehen des iars, dv von Christes gebvrt waren Tausent iar. vnd drev hunder iar, dar nach im driten iar, an sant Mathez abent, datz vmervelt.

Source Fulltext: RAAB, Seitenstetten (=FRA II/33, Wien 1870) S. 134-135