Ich Ott der Stainer, tvn chvnt allen den. di disen brif ansehent, oder horen lesen, daz ich mit gutem willen di mvl im lueg, di ich ze rechtem lehen het von dem Gotshavs datz Sytensteten, han avf gegeben meinem herren apt Chvnraten von Sytensteten vnd seinem gotshavs, vmb czwelf pfvnt pfenning, ob auer iemen wer, der daz vor genant gotshavs an sprech vmb di selben mvl, des sol ich vnd meinev chint des selben gotshaus gewer sein, Dar vmb gib ich apt Chvnraten von Sytensteten vnd seinem gotshavs meinen brif. besteting mit meinem insigel, vnd mit dem meines swehers hern Chonrates von Schevrberch, Des sint gezevge, di da pei gewesen sint; her Nycola der Schevrberch. her Heinrich von winden, Herman der Nevnberger, vnd Leopolt der gottelebe, wernhart der amman ab der zogelsaw, Lvtwich der amman von ypsitz, Daz ist geschehen des jars. dv waren von vnsers hern gebvrte tavsent jar, vnd drevhundert jar, dar nach in dem nehsten jar, an sant Matheis tag.

Source Fulltext: RAAB, Seitenstetten (=FRA II/33, Wien 1870) S. 130-131