Ich Albrecht der Pyemir vnd ich Peterse sein Hausvrowe vnd ich Hainrich Pyemir sein Pruder Wir veriehen vnd tvn chunt allen den, die disen prief lesent oder horent lesen, die nv lebent vnd hernach chvnftich sint, Daz wir mit guten willen vnd gunst aller vnser erben, mit verdachten mute vnd mit gesampter hant, nach vnser pesten vreunde Rat, zv der zeit, do wir ez wol getun mochten, recht vnd redelichen verchauft haben vnserm Gruntherren dem Erbern Manne hern Vlreichen, dem Pharrer ze Haymburch vnd zv den zeiten Capplan vnd verweser der Cappellen datz sand Pangraetzen, ayn phunt Wienner phenninge geltes Purchrechtes auff vnserm Hause, daz da leit oberthalben sand Pangraetzen zenehest Fridreichs hause des Pucheler, des er selber Gruntherre, Stifter vnd Storer ist, davon man im dient alle Jar ze rechtem Gruntrechte fvmf vnd dreizzich Wienner phenninge der vorgenanten Cappellen, vnd zwelf Schillinge geltes Purchrechtes, die e darauffe ligent, die man auch dient alle Jar ze drin zeiten den vrowen hintz sand Chlaren vnd nicht mer, mit allem dem nutze vnd rechte ze dienne, als Purchrechtes Recht ist, vmb acht phunt phenninge Wienner Mv^entze, der wir gar vnd gantz verricht vnd gewert sein, ledechlichen vnd vreilichen ze haben vnd allen seinen frvmen damit ze schaffen, verchauffen, versetzen vnd geben, swem er wil, als im daz wol chom vnd fuege, an allen irresal. Vnd schullen auch im dazselbe Purchrecht alle Jar diennen von dem egenanten vnserm hause ze drin zeiten, achtzich phenninge an sand Georgen Tage, achtzzich phenninge an sand Michels Tage vnd achtzzich phenninge ze weinachten, vnuertzogenlichen in allem dem rechten, als man an der Purchrecht dient in der Stat ze Wienne. Vnd durch pezzer sicherhait so setzen wir vns, ich vorgenanter Albrecht der Pyemir vnd ich Peterse sein Hausvrowe vnd ich Hainrich der Pyemir sein Pruder, vnuerschaidenlichen mitsampt vnsern erben dem egenanten vnserm Gruntherren hern Vlreichen, dem Pharrer ze Haymburch vnd Capplan datz sand Pangretzen, oder swem er dazselbe Purchrecht schaft oder geit an seiner Stat, furbaz rechter Scherm vnd gewer fur alle ansprache, als ewiges Purchrechtes recht ist und der Stat recht ze Wienne. Vnd swaz im furbaz daran abeget, daz schol er haben vnuerschaidenlichen auf vns vnd auf allem vnserm gut, daz wir haben in dem Lande ze Osterrieh, wir sein lebentig oder tod. Vnd wand wir selber aygner Insigel niht haben, darvber so geben wir im disen prief ze ainem offen vrchunde vnd ze ainer ewigen vestnunge versigilten mit der erbern Purger Insigeln, hern Chunrats des Wiltwurcher zv den zeiten Purgermaister ze Wienne, hern Hainrichs vnd hern Michels paider pru^edere der Wurffele, die diser sache gezevge sint mit iren Insigiln. Diser prief ist geben nach Christes geburt Dreutzehenhundert Jar darnach in dem zway vnd viertzigistem Jar, an dem Ebenweich Tage.

Source Fulltext: HAUSWIRTH, Schotten (=FRA II/18, 1859) S. 231-232