Ich Stephan der Porssenprunner vnd ich Margret sein hausvrowe Wir vergehen vnd tv^en chvnt allen den, die disen brief lesent oder ho^erent lesen, die nv lebent vnd hernach chvnftich sint, Daz wir mit vnser erben gu^eten willen vnd gunst, mit verdachtem mv^et vnd mit gesampter hant, zu^e der zeit, do wir iz wol getu^en mochten, recht vnd redleich verchauft vnd geben haben vnsers rechten aigens vnsern Hof, der da leit datz dem Helphantz, des Drev Lehen sint, vnd alles daz, daz darzv geho^eret, ze velde vnd ze dorffe, ez sei gestift oder vngestift, versu^echt oder vnuersu^echt, swie so daz genant ist, mit alle dem nvtz vnd recht, alz wir In in aigens gewer herpracht haben, vmb Hvndert phvnt wienner phenninge, der wir gar vnd gaentzleich gewert sein, dem erbern manne Jansen dem Helphant vnd seinen erben fv^erbaz ledichleichen vnd vreileichen ze haben vnd allen im frvmen damit ze schaffen, verchauffen, versetzen vnd geben, swem si wellen, an allen irresal. Vnd darv^eber zv^e einer pezzern sicherhait so setzen wir vns, ich Stephan der Porssenprvnner vnd ich Margret sein hausvrowe vnd ich Jans der Maer vnd ich An sein hausvrowe vnd ich Hainreich, hern Pauln svn des Maêrn, vnuersehaidenleich fv^er vns vnd fv^er alle vnser erben, swie so di genant sint, v^eber den vorgenanten Hof vnd v^eber alles daz, daz darzv^e geho^eret, alz vor verschriben ist, dem vorgenanten Jansen dem Helphant vnd seinen erben ze rechten gewern vnd scherm fv^er alle ansprach, alz aigens recht ist vnd des Landes recht ze O^esterreich. Waer aber, daz si mit recht an demselben Hof vnd an alle dev, vnd darzv^e gehoret, icht Chrieges oder ansprach gewunnen, von swem daz waer, swaz si des schaden nement, daz si bei irn trewen gesagen mv^egen, daz svln wir in alles ausrichten vnd widerchern an alle ir mv^e vnd allen irn schaden, vnd svln auch si daz haben auf vns vnuerschaidenleich vnd auf allem vnserm gv^et, daz wir haben in dem Lande ze O^esterreich oder swo wir es haben, wir sein lebentich oder tode. Vnd daz diser Chauf fu^erbaz also staet vnd vnzerbrochen beleibe, darvmb so geben wir in disen brief zv einem warn vrchu^ende vnd zv^e einer ewigen vestnvnge diser sache versigilt mit vnsern Insigiln. Diser brief ist geben ze Wienne nach Christes gepurt dreutzehen Hundert iar darnach in dem ains vnd viertzgisten iar, an sant Andres Tage.

Source Fulltext: HAUSWIRTH, Schotten (=FRA II/18, 1859) S. 230-231