"Von Gottes genaden, wir, Wolffganng(1), bischoue zw Passaw etc. Bekhennen das wir vnnserm getreuen Georgen Khelhaimer(2), burgern zw Haslach, an stat vnnd zu hannden sannd Niclas gotzhaus daselbs zw Haslach, als desselben zechmaister vnnd lehenntragern, das guet in der Voraw(3) in Peurbeckher pharr vnnd lanndtgericht, jtem vnnd das guet zw Hartmansdorff(4), in sanndt Peters pharr vnnd Haslinger lanndtgericht gelegen, so von vnns vnnd vnnserm stifft Passaw zw lehen ruern vnnd geen, zu rechtem lehen verlihen haben, verleihen jme die auch mit allen jren zugehorungen hiemit wissenntlich vnnd in crafft ditz brieffs, was vnnd souill wir jme dan billich von lehen vnnd rechtens wegen daran verleihen sollen vnnd mugen. Darauff hat er vnns gewondliche lehennpflicht gethan vnnd an aidesstat gelobt, vnns vnnd vnnserm stifft Passaw getreu vnnd gewertig ze sein, vnnsern vnnd vnnsers stiffts fromen ze furdern, schaden zewarnen vnnd zewennden, vnnd die verschwigen lehen wo er deren wissen hette oder erfuere, antzutzaigen, auch von den lehen, so jme verlihen sind, geuerlich nichts veranndern oder enntziehen zelassen, noch jchts on vnnser alls lehennherren wissen vnnd willen daraus zu uerkhomern, vnnd sich soverre in allen anndern sachen zehallten als ain getreuer lehennsman vnnd trager von solcher lehen wegen zethuen schulldig ist, ongeuerde. Zw vrkhundt des briefs vnnder vnnserm anhangunden jnnsigl. Geben in vnnser stat Passaw, sonntags den sibennden monatstag nouembris, nach Christi vnnsers lieben herrn vnnd seligmachers geburde funfftzehen hundert vnnd im sechsvndviertzigissten jare."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 606 (S 434), S. 676